मुरबाड: शेजार धर्माला काळिमा फासणारी धक्कादायक घटना घडली आहे. शेजारी राहणाऱ्या १६ वर्षीय शाळकरी पीडित मुलीचे आंघोळ करतानाचे अश्लील फोटो व्हायरल करण्याची आणि कुटुंबालाही ठार मारण्याची धमकी देऊन तिच्यावर शेजारी राहणाऱ्या ३७ वर्षीय आरोपीने बलात्कार केल्याची धक्कादायक घटना समोर आली आहे. खळबळजनक बाब म्हणजे आरोपीवर गुन्हा दाखल होताच त्याने मित्राच्या घरी जाऊन विष प्राशन करीत आत्महत्या केली आहे.मिळालेल्या माहितीनुसार, ही घटना ठाणे जिल्ह्यातील मुरबाड तालुक्यातील एका गावात घडली आहे. याप्रकरणी आत्महत्या करणाऱ्या ३७ वर्षीय आरोपीवर बलात्कारासह विविध कलमानुसार आणि पोक्सो कायद्या अंर्तगत गुन्हा दाखल करून पोलिसांनी तपास सुरू केला आहे. पीडित शाळकरी मुलगी मुरबाड तालुक्यातील एका गावात कुटुंबासह राहून गावातील शाळेतच दहावी वर्गात शिक्षण घेत आहे. तर ३७ वर्षीय आरोपीचा विवाह झाला असून पत्नी त्याला सोडून गेली आहे. तो पीडित मुलीच्या शेजारी राहत होता.
चिमुकली मैत्रिणींसोबत खेळत होती; चॉकलेट देतो सांगत व्यक्तीनं मुलीला घरी नेलं, क्रूर कृत्यानं परिसर हादरला
जानेवारी २०२४ मध्ये मृत आरोपीची वाईट नजर शेजारी राहणाऱ्या शाळकरी पीडित मुलीवर पडली होती. आरोपीने पीडित मुलीच्या घरच्या मागे असलेल्या बाथरूममध्ये ती अंघोळ करतानाचे फोटो त्याने आपल्या मोबाइलमध्ये चित्रित केले. त्यानंतर तेच फोटो पीडित मुलीला दाखवून तिला फोटो व्हायरल करण्याची धमकी तसेच कुटुंबालाही मारण्याची धमकी देऊन तिच्यावर बाथरूममध्येच १८ जानेवारी २०२४ ते १५ फेब्रुवारी २०२४ पर्यत वारंवार बलात्कार करत होता. आरोपीच्या वाढत्या अत्याचारामुळे पीडित मुलीला त्रास असहाय्य होत असल्याने ती भयभीत होऊन शाळा आणि घरातही शांत होती.

त्यामुळे पीडितेच्या आईने तिच्याकडे अधिक चौकशी केली असता तिच्यावर घडत असेलला धक्कादायक प्रकार तिने आईला सांगितला. यानंतर याबाबत पोलीस ठाण्यात तक्रार दाखल करण्यात आली. दरम्यान, घटनेचे गांभीर्य ओळखून पोलिसांनी शाळकरी पीडित मुलीच्या आईच्या तक्रारीवरून ३७ वर्षीय शेजारी राहणाऱ्या आरोपीवर भादंवि कलम ३७६,(२)(एन ), ३७६ (३), ३५४(ए ) ३५४,( सी ), ३४१, ५०४, ५०६, सह पोक्सो कलम ४, ६, ८, १२ नुसार १८ फेब्रुवारी २०२४ रोजी मुरबाड पोलीस ठाण्यात गुन्हा दाखल केल्याची माहिती तपास अधिकारी बाबर यांनी दिली आहे.

मात्र गुन्हा दाखल होताच आरोपीने दुसऱ्या गावात राहणाऱ्या एका मित्राच्या घरी जाऊन विष प्राशन केल्याची माहिती समोर आली आहे. या घटनेमुळे मुरबाड तालुक्यात एकच खळबळ उडाली असून पोलीस या घटनेचा अधिक तपास करीत आहेत.