अंबरनाथ: अंबरनाथच्या पश्चिम भागात यशोदा हॉटेलमध्ये जेवायला बसलेल्या एका शिक्षकावर जीवघेणा हल्ला केला आहे. याच हॉटेलमध्ये दारू पिऊन शिवीगाळ करणाऱ्या आरोपीने हा हल्ला केला आहे. या घटनेने परिसरात खळबळ उडाली आहे.
कारागृहात राहिला, आरोपींशी ओळख केली, बाहेर येताच दीड कोटींचा कार्यक्रम केला!
मिळालेल्या माहितीनुसार, अंबरनाथच्या पश्चिम भागात असलेल्या हॉटेलमध्ये राजेश राजगोपालन हे जेवणासाठी बसले असताना त्यांच्या बाजूच्या टेबलावर बसलेला जॅक्सन नावाच्या व्यक्तीने दारूच्या नशेत देवांना शिवीगाळ सुरू केली होती. हॉटेलमध्ये बसलेल्या अनेकांनी त्याची समजूत काढण्याचा प्रयत्न केला. यावेळी राजेश यांनी देखील जॅक्सनला शिवीगाळ न करण्याचा सल्ला दिला.

यावेळी जॅक्सनने रागाच्या भरात राजेश यांना मारहाण केली. तसेच बिअरची बॉटल फोडून त्या फुटलेल्या बॉटलने राजेश यांच्या मानेवर वार केले. या हल्ल्यात राजेश हे गंभीर जखमी झाले. त्यांना सुरुवातीला उल्हासनगरच्या मध्यवर्ती रुग्णालयात हलवण्यात आले. मात्र प्रकृती चिंताजनक असल्याने त्यांना लागलीच ठाण्याच्या खाजगी रुग्णालयात हलवण्यात आले आहे.