राधाकृष्ण विखे पाटील – सुजय विखे पाटील

अहमदनगर जिल्ह्यातील शिर्डी विधानसभा मतदारसंघातून सलग सात वेळा राधाकृष्ण विखे पाटील यांनी आमदारकी भूषवली आहे. १९९५ पासून सहा विविध मुख्यमंत्र्यांच्या मंत्रिमंडळात त्यांनी १२ विविध मंत्रालयं सांभाळली आहेत. फडणवीस सरकारच्या काळात २०१४ ते २०१९ या काळात ते विधानसभेचे विरोधीपक्ष नेते होते. परंतु २०१९ च्या विधानसभा निवडणुकांच्या तोंडावर काँग्रेस सोडत त्यांनी भाजपात प्रवेश केला. त्यांच्याआधी त्यांचे सुपुत्र सुजय विखे यांनी लोकसभेपूर्वी भाजपात प्रवेश करुन अहमदनगरची खासदारकी जिंकली.

रणजीतसिंह नाईक निंबाळकर

नारायण राणे – नितेश राणे

अशोक चव्हाणांच्या आधी महाराष्ट्राचं मुख्यमंत्रिपद भूषवल्यानंतरही पक्षांतर करणारे नारायण राणे हे एकमेव नेते होते. नारायण राणे यांनी तर दोन वेळा पक्षांतर केलं आहे. २००५ मध्ये राणेंची शिवसेनेतून हकालपट्टी झाली होती. त्यानंतर त्यांनी काँग्रेसचा हात हाती घेतला. तिथे एक तप पूर्ण केल्यानंतर २०१७ मध्ये नारायण राणे यांनी काँग्रेसचीही साथ सोडली. त्यानंतर त्यांनी महाराष्ट्र स्वाभिमान पक्षाची स्थापना केली. ऑक्टोबर २०१९ मध्ये राणेंनी आपला पक्ष भाजपमध्ये विलीन केला. त्याच वेळी त्यांचे सुपुत्र आमदार नितेश राणेंनीही काँग्रेस सोडून भाजपात प्रवेश केला.

हर्षवर्धन पाटील

सलग तीन वेळा अपक्ष आमदार झालेल्या हर्षवर्धन पाटील यांनी २००९ मध्ये काँग्रेसच्या तिकीटावर आमदारकी मिळवली. इंदापूर मतदारसंघातून सलग चारवेळा आमदार झालेल्या हर्षवर्धन पाटलांना २०१४ च्या निवडणुकीत मात्र राष्ट्रवादीचे उमेदवार दत्ता भरणे यांच्याकडून पराभव स्वीकारावा लागला होता. सप्टेंबर २०१९ मध्ये हर्षवर्धन पाटील यांनी काँग्रेसला रामराम ठोकून भाजपात प्रवेश केला. मात्र २०१९ च्या विधानसभेलाही त्यांना पराभवाचा धक्का बसला.

कालिदास कोळंबकर

कालिदास कोळंबकर हे आठ वेळा विविध पक्षांतर्फे महाराष्ट्राच्या विधानसभेवर निवडून गेले आहेत. कोळंबकर हे मुंबईतील नायगांव मतदारसंघातून शिवसेना पक्षातर्फे चारवेळा विधानसभेरवर निवडून गेले होते. त्यानंतर ते पक्ष बदलून काँग्रेस पक्षातर्फे वडाळा मतदारसंघातून दोनदा विधानसभेवर निवडून गेले. २०१९ मध्ये पुन्हा एकदा पक्ष बदलून ते वडाळ्यातून भाजपतर्फे विधानसभेवर निवडून गेले.

जयकुमार गोरे

जयकुमार गोरे हे साताऱ्यातील माण विधानसभा मतदारसंघातून पहिल्यांदा अपक्ष निवडून आले होते. २०१४ मध्ये गोरेंनी काँग्रेसमध्ये प्रवेश करत आमदारकी मिळवली. २०१९ मध्ये वाहत्या वाऱ्याचा अंदाज घेत गोरेंनी काँग्रेसला सोडचिठ्ठी देत भाजपची वाट धरली. प्रत्येक वेळी त्यांना आमदारकी टिकवण्यात यश आलं.

अब्दुल सत्तार

अब्दुल सत्तार २०१४ मध्ये महाराष्ट्रातील काँग्रेस सरकारमध्ये काही काळ मंत्री होते. २०१९ मध्ये त्यांनी काँग्रेस सोडून शिवसेनेत प्रवेश केला. छत्रपती संभाजीनगर जिल्ह्यातील सिल्लोड मतदारसंघातून ते तीन वेळा महाराष्ट्र विधानसभेचे सदस्य राहिले आहेत. त्यांनी राज्याचे पशुसंवर्धन कॅबिनेट मंत्री म्हणून काम केले आहे. शिवसेनेत फूट पडल्यानंतर अब्दुल सत्तार यांनी एकनाथ शिंदे यांची साथ दिली. सत्तारांना शिंदे सरकारमध्येही मंत्रिपद मिळालं.

कृपाशंकर सिंग

२००४ मध्ये काँग्रेस मंत्रिमंडळात कृपाशंकर सिंग यांनी राज्यमंत्रिपद भूषवलं होतं. २००९ च्या महाराष्ट्र विधानसभा निवडणुकीत मुंबईत शिवसेनेच्या विरोधात काँग्रेसला आघाडी मिळवण्यात त्यांनी महत्त्वाची भूमिका बजावली होती. ते जून २०११ पर्यंत भारतीय राष्ट्रीय काँग्रेस पक्षाच्या मुंबई विभागाचे अध्यक्ष होते. गेल्या मुंबई महापालिका निवडणुकीत त्यांनी सांताक्रूझ मतदारसंघातून विजय मिळवला होता. उत्पन्नापेक्षा अधिक संपत्ती जमवल्या प्रकरणी त्यांचं कुटुंब तपास यंत्रणांच्या रडारवर होतं. २०१९ च्या निवडणुकांवेळी कृपाशंकर यांनी काँग्रेसला रामराम ठोकला. परंतु दोन वर्ष ते कुठल्याच पक्षात नव्हते. २०२१ मध्ये मात्र त्यांनी भाजपचा झेंडा खांद्यावर घेतला.

सत्यजीत तांबे

महाराष्ट्र युवक काँग्रेसचे सात वर्ष उपाध्यक्षपद, चार वर्ष अध्यक्षपद सांभाळणारे सत्यजीत तांबे आणि त्यांचे पिता सुधीर तांबे हे दीर्घ काळ काँग्रेससोबत होते. २०२२ च्या विधानपरिषद निवडणुकीत काँग्रेसने उमेदवारी नाकारल्यानंतर सत्यजीत यांनी नाशिक पदवीधर मतदारसंघातून अपक्ष अर्ज भरला. त्यानंतर काँग्रेसने तांबे पितापुत्राचे पक्षातून निलंबन केले. तांबे सध्या कुठल्याही राजकीय पक्षाशी निगडित नाहीत.

मिलिंद देवरा

दक्षिण मुंबईतून खासदारकी भूषवलेल्या मिलिंद देवरा यांनी गेल्याच महिन्यात काँग्रेससोबतचं दीर्घकालीन नातं संपवलं. देवरा यांनी मुख्यमंत्री एकनाथ शिंदे यांच्या नेतृत्वातील शिवसेनेत प्रवेश केला आहे. आगामी विधानसभा आणि मुंबई महापालिका निवडणुकांच्या तोंडावर काँग्रेससाठी हा मोठा धक्का आहे.

बाबा सिद्दीकी

माजी आमदार बाबा सिद्दीकी यांनी गेल्याच आठवड्यात काँग्रेसला सोडचिठ्ठी दिली. सिद्दीकी ४० हून अधिक वर्ष काँग्रेससोबत होते. त्यांनी अजित पवार यांच्या नेतृत्वातील राष्ट्रवादी काँग्रेसमध्ये प्रवेश केला आहे. आगामी विधानसभा आणि मुंबई महापालिका निवडणुका लक्षात घेता बाबा सिद्दीकी यांच्या रुपाने राष्ट्रवादीला मुंबईत ताकद मिळण्याची अपेक्षा आहे.

अशोक चव्हाण

काँग्रेसला बसलेला ताजा धक्का म्हणजे माजी मुख्यमंत्री अशोक चव्हाण यांचे पक्षांतर. आमदारकी, खासदारकी, प्रदेशाध्यक्षपद, मंत्रिपद, महाराष्ट्राचे मुख्यमंत्रिपद अशी विविध पदं भूषवलेल्या अशोक चव्हाण यांनी काँग्रेसला रामराम ठोकला. दुसऱ्याच दिवशी त्यांनी भाजपचा झेंडा हाती धरला आहे. अशोक चव्हाणांपाठोपाठ आणखी काही आमदार भाजपप्रवेश करण्याची शक्यता वर्तवली जाते. चव्हाणांच्या पक्षप्रवेशाने भाजपला मराठवाड्यात मोठी ताकद मिळणार आहे.