म. टा. प्रतिनिधी, पुणे : कुख्यात गुंड शरद मोहोळ खून प्रकरणात अटक केलेल्या दोन वकिलांसह सात आरोपींना १७ फेब्रुवारीपर्यंत ‘मकोका’ कोठडीत ठेवण्याचा आदेश विशेष न्यायाधीश व्ही. आर. कचरे यांनी दिला. त्यामुळे या गुन्ह्यातील मुख्य सूत्रधार गणेश मारणे आणि विठ्ठल शेलार यांच्यासह सर्व आरोपी आता ‘मकोका’ कोठडीत असून, त्यांची समोरासमोर चौकशी केली जाणार आहे. त्यातून या आरोपींचा गुन्ह्याच्या कटातील सहभाग निष्पन्न होण्याची शक्यता आहे.

पाच जानेवारीला कोथरूडमधील सुतारदरा परिसरात मोहोळचा खून झाला. या प्रकरणात अटक केलेल्या सर्व आरोपींवर महाराष्ट्र संघटित गुन्हेगारी नियंत्रण कायद्यांतर्गत (मकोका) कारवाई करण्याचे आदेश पोलिस आयुक्तांनी दिले आहेत. तत्पूर्वी, या गुन्ह्यात अटक केलेल्या अॅड. रवींद्र पवार, अॅड. संजय उडान, धनंजय मारुती वटकर, नितीन अनंता खैरे, आदित्य विजय गोळे आणि संतोष दामोदर कुरपे, रामदास ऊर्फ वाघ्या मारणे यांना न्यायालयीन कोठडीत ठेवण्यात आले होते. या आरोपींना सोमवारी ‘मकोका’ न्यायालयात प्रथमच हजर करण्यात आले.

आरोपींच्या चौकशीचा युक्तिवाद

‘गुन्ह्याच्या कटातील सहभाग निष्पन्न करण्यासाठी या सर्व आरोपींची समोरासमोर चौकशी करायची आहे; तसेच त्यांच्या मालमत्तेबाबत सखोल तपास करायचा आहे,’ असे तपास अधिकारी सहायक पोलिस आयुक्त सुनील तांबे आणि विशेष सरकारी वकील प्रमोद बोंबटकर यांनी न्यायालयात सांगितले. न्यायालयाने सरकार आणि बचाव पक्षाचा युक्तिवाद ऐकल्यावर आरोपींना ‘मकोका’ कोठडी सुनावली.
Read Latest Maharashtra News And Marathi News
राज्यसभा निवडणुकीत नवा ट्विस्ट, भाजप चौथा उमेदवार देण्याची शक्यता, काँग्रेसच्या अडचणीत वाढ?

गणेश मारणेला नाशिकमधून अटक

शरद मोहोळ याच्या हत्येप्रकरणातील मुख्य संशयित गणेश मारणे याला पुणे पोलिसांनी नाशिकमध्ये ३१ जानेवारीला रात्री उशिरा अटक केली होती. नाशिकरोड परिसरातून फिल्मी स्टाइल पाठलाग करून पोलिसांनी मारणेला पोलिसांनी अटक केली होती. गुप्त माहितीच्या आधारे मारणेचा माग काढत, पुणे पोलिसांचे एक पथक नाशिकमध्ये आले होते. मोहोळ हत्या प्रकरणात २० हून अधिक संशयितांना पुणे पोलिसांनी अटक केलेली आहे. शरद मोहोळ याच्या खून प्रकरणानंतर पुण्यासह राज्यात खळबळ उडाली होती.