सोलापूर : सोलापूर शहरातील दोनशे मुस्लिम बांधव अजमेर दर्गाहसाठी रवाना होत आहेत. काँग्रेसचे नेते नजीब शेख यांनी स्वखर्चातून दोनशे भाविकांसाठी अजमेर येथील ख्वाजा गरीब नवाज दर्गाला जाण्याची व्यवस्था केली आहे. यानिमित्ताने मुजीब शेख यांनी काँग्रेस आमदार प्रणिती शिंदे यांना भाविकांना रवाना करण्यासाठी प्रमुख पाहुणे म्हणून बोलवले होते. सर्व भाविकांना उद्देशून बोलताना काँग्रेस आमदार प्रणिती शिंदेंनी शुभेच्छा दिल्या. “अजमेर जाकर ख्वाजा गरीब नवाज इनके सामने मेरे लिये दुआ करो और पार्टी के लिये दुआ करो” अशी भावनिक साद घातली. देशातील भाजप सत्तेमुळे गोरगरीब जनता, अल्पसंख्याक आणि दलित हे असुरक्षित आहेत. महाराष्ट्र राज्यात आणि देशात काँग्रेस आली तर सर्व सुरक्षित राहतील असेही प्रणिती शिंदे म्हणाल्या.
लोकसभेसाठी प्रार्थना करण्याचं आवाहन
आगामी काळात लोकसभेच्या निवडणुका संपन्न होणार आहेत. सोलापूर लोकसभा मतदारसंघात मुस्लीम मतदारांची भूमिका महत्वपूर्ण आहे. मुस्लिम मतदार निसटू नये यासाठी आमदार प्रणिती शिंदे आणि माजी केंद्रीय मंत्री सुशीलकुमार शिंदे सोलापुरातील प्रत्येक कार्यक्रमाला हजेरी लावत आहेत. बुधवारी सायंकाळी सोलापूर शहरातील केएमसी गार्डन या ठिकाणी स्थानिक नेते नजीब शेख यांनी छोटेखानी कार्यक्रम आयोजित केला होता. काँग्रेस आमदार प्रणिती शिंदे कार्यक्रमाला आवर्जून हजर होत्या. भाषण करताना प्रणिती शिंदेंनी मुस्लिम महिलांना आणि पुरुषांना आवाहन करत लोकसभेच्या निवडणुकीसाठी अप्रत्यक्षपणे प्रार्थनेसाठी आवाहन केले आहे.
देशात आणि राज्यात काँग्रेसची सत्ता आली तरच तुम्ही सुरक्षित : प्रणिती शिंदे
देशातील आणि राज्यातील जातीय समीकरण बदलले आहे. समाजात द्वेष निर्माण झाला आहे. दलित, मुस्लिम आणि इतर अल्पसंख्याक हे सुरक्षित नाहीत. देशात काँग्रेसची सत्ता आली तरच अजमेर सुरक्षित राहील असेही प्रणिती शिंदे म्हणाल्या. भारतात फक्त काँग्रेस ही एकमेव पार्टी अशी आहे जी भाजप आणि नरेंद्र मोदी यांना हरवू शकते. म्हणून मला अजमेरला जाण्याअगोदर वचन द्या, आगामी सर्व निवडणुकांत फक्त काँग्रेसला मतदान कराल, असेही प्रणिती शिंदे म्हणाल्या.