शरद पवारांकडून तयारीचे आदेश

काँग्रेसकडून सक्षम उमेदवाराचा शोध सुरू असताना राष्ट्रवादी काँग्रेसच्या शरद पवार गटाचे अमरावती जिल्ह्यातील शिवाजी शिक्षण संस्थेचे अध्यक्ष हर्षवर्धन देशमुख यांचे नाव पुढे आले आहे. वर्धा लोकसभा मतदारसंघात वरुड, मोर्शी मतदारसंघ येतो. शिवाजी शिक्षण संस्थेच्या माध्यमातून देशमुख यांची ताकद दुणावते. दोन दिवसांपूर्वी राष्ट्रवादी काँग्रेसचे अध्यक्ष शरद पवार यांनी देशमुख यांना वर्धा लोकसभेसाठी कामाला लागण्याचे निर्देश दिल्याची माहिती आहे. खुद्द देशमुख यांनी वर्धा जिल्ह्यातील कार्यकर्त्यांना ही माहिती दिली. राष्ट्रवादीकडून ही दावेदारी कली जात असली तरी काँग्रेस कार्यकर्ते हा मतदारसंघ आपल्याच ताब्यात राहावा यासाठी प्रयत्न करीत आहेत.
वेध लोकसभा निवडणुकीचा: सोलापुरात काय होणार? भाजपकडून उमेदवार कोण? भाजपच्या हिंदुत्वाला प्रणिती शिंदे टक्कर देणार
शिंदे, अजित पवार गटाच्याही हालचाली

राष्ट्रवादी काँग्रेस शरद पवार गटाला ही जागा सुटली तर महायुतीमधील राष्ट्रवादी अजित पवार गटदेखील माजी केंद्रीय मंत्री सुबोध मोहिते यांच्यासाठी वर्धा लोकसभेची जागा मागणार आहे. त्यामुळे पुढे शरद पवार गट विरुद्ध अजित पवार गट असा सामनादेखील लढला जाण्याची शक्यता नाकारता येत नाही. राष्ट्रवादी काँग्रेस अजित पवार गटाचे प्रदेश संघटन सचिव राणा रणनवरे यांनी सुबोध मोहिते यांना जागा मिळेल, असा दावा केला आहे. दुसरीकडे शिवसेनेच्या शिंदे गटातून माजी मंत्री तथा शिवसेनेचे उपनेते अशोक शिंदे आणि पूर्व विदर्भप्रमुख किरण पांडव यांनी निवडणूक लढवावी, अशी मागणी कार्यकर्त्यांच्या बैठकीतूनन झाली.