म. टा. प्रतिनिधी, छत्रपती संभाजीनगर : छत्रपती संभाजीनगर शहरासाठी आज, सोमवारपासून सुरू होणारे नवे वर्ष ‘मोस्ट हॅपनिंग इयर’ ठरणार आहे. काही महत्त्वाच्या योजना प्रत्यक्षात येणार असून काही योजनांची सुरुवात या वर्षात होणार आहे. त्यामुळे शहराकडे पाहण्याचा दृष्टिकोन बदलेल असे मानले जात आहे.
छत्रपती संभाजीनगर शहराचे काही प्रमुख प्रश्न पाच ते दहा किंवा त्यापेक्षा जास्त वर्षांपासून रखडले आहेत. त्यामुळे शहराची प्रतिमा राज्य आणि देशाच्या पातळीवर म्हणावी तशी उजळ राहिलेली नाही. ही प्रतिमा येत्या वर्षात बदलण्याचा प्रयत्न यंत्रणा करीत आहेत. त्यात महापालिकेचा सिंहाचा वाटा असणार आहे.
छत्रपती संभाजीनगर शहराचे काही प्रमुख प्रश्न पाच ते दहा किंवा त्यापेक्षा जास्त वर्षांपासून रखडले आहेत. त्यामुळे शहराची प्रतिमा राज्य आणि देशाच्या पातळीवर म्हणावी तशी उजळ राहिलेली नाही. ही प्रतिमा येत्या वर्षात बदलण्याचा प्रयत्न यंत्रणा करीत आहेत. त्यात महापालिकेचा सिंहाचा वाटा असणार आहे.
पाणीपुरवठा योजना
शहरासाठी महत्त्वाची असलेली पाणीपुरवठा योजना नवीन वर्षात पूर्ण होऊन कार्यान्वित होण्याची शक्यता आहे. शहराचा विस्तार आणि गरज लक्षात घेता दोन हजार ५०० मिलीमीटर व्यासाची नवीन पाणीपुरवठा योजना तयार करण्यात आली असून त्याचे काम गतीने सुरु आहे. डिसेंबर २०२४ पर्यंत हे काम पूर्ण करुन पाणीपुरवठा योजना कार्यान्वित करण्याचे ध्येय ठेवण्यात आले आहे. पाणीपुरवठा योजनेच्या कामाला मुदतवाढ देऊन डिसेंबर २०२४ ही नवीन मुदत देण्यात आली आहे. ती साध्य करण्याच्या दृष्टीने काम केले जात आहे. ही योजना प्रत्यक्षात आल्यास शहराचा दोनपेक्षा जास्त दशकांचा पाणीप्रश्न संपुष्टात येईल.
विकास आराखडा
छत्रपती संभाजीनगर शहराच्या विकास आराखड्याचा प्रश्न दोन दशकांपेक्षा जास्त काळापासून प्रलंबित आहे. शासनाने नियुक्त केलेल्या विशेष अधिकाऱ्यामुळे व महापालिका प्रशासनाच्या पाठपुराव्यामुळे पाच ते सात महिन्यात विकास आराखड्याचा विषय मार्गी लागण्याची शक्यता आहे. पीएलयुचे काम (प्रस्तावित जमीन वापर नकाशा) अंतिम टप्प्यात असल्याची माहिती महापालिकेचे प्रशासक जी. श्रीकांत यांनी दिली आहे.
ठाकरे स्मारक
शिवसेनाप्रमुख बाळासाहेब ठाकरे यांचे स्मारक आणि स्मृतीवनाचे काम सिडकोत एमजीएमच्या परिसरात असलेल्या प्रियदर्शिनी उद्यानात केले जात आहे. अत्याधुनिक तंत्रज्ञानाने तयार उभारण्यात येत असलेले हे स्मारक नवीन वर्षात लोकार्पणाच्या स्थितीत येणार आहे. त्याशिवाय मराठवाडा मुक्तिसंग्राम संग्रहालय, डॉ. बाबासाहेब आंबेडकर संशोधन केंद्र आणि छत्रपती शिवाजी महाराज पुराणवस्तू संग्रहालय या तीन संग्रहालयांचे नुतनीकरण देखील नवीन वर्षात सुरू होणार आहे.
भूमिगत गटार योजना
केंद्र सरकारच्या ‘अमृत’ योजनेतून शहराच्या उपनगरात भूमिगत गटार योजनेची कामे केली जाणार आहेत. सातारा-देवळाई भागात ही कामे सुरू झाली असून, येत्या काही महिन्यांत पडेगाव-मिटमिटा या भागासह शहराच्या ज्या भागात ड्रेनेजलाइन नाही, त्या भागात ड्रेनेजलाइन टाकण्याचे काम सुरू केले जाणार आहे. या कामाला सरकारकडून मंजुरी मिळाली आहे. ही कामे झाल्यास शहर सेप्टी टँकमुक्त होऊ शकेल.
सफारी पार्क
‘स्मार्ट सिटी’च्या माध्यमातून मिटमिटा परिसरात सफारी पार्क उभारण्याचे काम केले जात आहे. हे काम डिसेंबर २०२४ पर्यंत पूर्ण करण्याचे नियोजन करण्यात आले आहे. हे काम पूर्ण झाल्यावर सिद्धार्थ उद्यानातील प्राणिसंग्रहालय सफारी पार्कच्या जागेत स्थलांतरित केले जाणार आहे, नवीन प्राणी आणण्याचे प्रयत्नदेखील पालिकेच्या यंत्रणेकडून केले जात आहेत. सिंहाची जोडी सफारी पार्कमध्ये पर्यटकांना पाहण्यास मिळू शकते.
टीडीआरबाबत छत्रपती संभाजीनगर महापालिकेचा मोठा निर्णय; क्रेडाईच्या आक्षेपानंतर एक पाऊल मागे
पालिकेची नवीन इमारत
महापालिकेची नवीन प्रशासकीय इमारत मजनू हिलच्या परिसरात उभारण्याची तयारी महापालिकेने केली आहे. त्यासाठी आवश्यक ती प्रक्रिया पूर्ण केली जात असून इमारतीच्या कामाचे भूमिपूजन नवीन वर्षाच्या सुरुवातीच्या काही महिन्यात केले जाण्याची शक्यता आहे. पालिकेच्या नवीन प्रशासकीय इमारतीची चर्चा काही वर्षांपासून सुरू होती, आता ही चर्चा संपुष्टात येणार आहे.
याशिवाय पीएम-ई बस योजनेअंतर्गत शंभर ई-बसचा प्रकल्प, गरवारे स्टेडियमचे रूपांतर आंतरराष्ट्रीय स्टेडियममध्ये करणे, ग्लो गार्डन, अॅडव्हेंचर पार्क, वॉटर पार्क ही कामे देखील नवीन वर्षात सुरू केली जाणार आहेत. त्यामुळे नवीन वर्ष छत्रपती संभाजीनगरसाठी बरेच काही चांगले प्रकल्प घेऊन येणारे ठरेल असे मानले जात आहे.
नवीन वर्षात बरेच नवीन प्रकल्प प्रत्यक्षात येतील. काही नवीन कामे देखील सुरु केली जाणार आहेत. त्याचे नियोजन महापालिकेने केले आहे. त्यामुळे नवीन वर्ष शहरासाठी सर्वांगीण विकासाचे ठरणार आहे. त्यासाठी आमची यंत्रणा सज्ज आहे.-जी. श्रीकांत, आयुक्त तथा प्रशासक, महापालिका