म. टा. प्रतिनिधी, नाशिक : शहरात दाखल होणाऱ्या बिऱ्हाड मोर्चामुळे आज, रविवारी मुंबई-आग्रा महामार्गावरील सर्व्हिस रोडसह उपनगरांतील रस्त्यांवरील एकेरी वाहतूक बंद ठेवण्यात आली आहे. मोर्चात पंधरा ते वीस हजार शेतकऱ्यांचा सहभाग असल्याने सुरक्षेसाठी पोलिसांनी हा निर्णय घेतला आहे. मोर्चा काहीवेळ शहरातील गोल्फ क्लब मैदानात थांबणार असल्याने वाहतूक कोंडीसह शहरात चक्काजाम होण्याची शक्यता नाकारता येत नाही.
सत्यशोधक ग्रामीण कष्टकरी सभेचे सचिव विक्रम गावीत यांच्यामार्फत नंदूरबार ते मुंबई काढण्यात आलेला बिऱ्हाड मोर्चा आज, रविवारी (दि. १७) नाशिक शहरात दाखल होत आहे. नवापूरच्या विसरवाडीतून मार्गस्थ झालेला मोर्चा आज नाशिक शहरातून जाणार असल्याने महामार्गावर वाहतूक कोंडीची शक्यता आहे. त्यामुळे परिसरनिहाय रस्त्यांवर पोलिसांनी निर्बंध लागू केले आहेत. तर, पर्यायी रस्त्यांवरून वाहनांना मार्गस्थ होण्याच्या सूचना वाहतूक पोलिसांनी केल्या आहेत.
सत्यशोधक ग्रामीण कष्टकरी सभेचे सचिव विक्रम गावीत यांच्यामार्फत नंदूरबार ते मुंबई काढण्यात आलेला बिऱ्हाड मोर्चा आज, रविवारी (दि. १७) नाशिक शहरात दाखल होत आहे. नवापूरच्या विसरवाडीतून मार्गस्थ झालेला मोर्चा आज नाशिक शहरातून जाणार असल्याने महामार्गावर वाहतूक कोंडीची शक्यता आहे. त्यामुळे परिसरनिहाय रस्त्यांवर पोलिसांनी निर्बंध लागू केले आहेत. तर, पर्यायी रस्त्यांवरून वाहनांना मार्गस्थ होण्याच्या सूचना वाहतूक पोलिसांनी केल्या आहेत.
– सकाळी आठ वाजता मोर्चा नाशिकमध्ये येणार
– मोर्चात १५-२० हजार शेतकरी सहभागी
– गोल्फ क्लब मैदानातून शिष्टमंडळ आदिवासी विकास भवनात
– पाच पदाधिकाऱ्यांचे शिष्टमंडळ असणार
– शिष्टमंडळ कार्यालयातून येईपर्यंत मोर्चा मैदानातच असेल
– पांडवलेणी पायथ्याशी पीरबाबा सैय्यद मलिक हुसैनी दर्गाशेजारील मोकळ्या जागेत मोर्चाचा मुक्काम
मोर्चाचा शहरातील मार्ग
पहिला टप्पा : ओझर येथून दहावा मैल, ट्रक टर्मिनल, आडगाव चौफुली, अमृतधाम चौफुली, स्वामी नारायण चौफुली, संतोष टी पॉइंट, काट्या मारुती चौकातून निमाणीमार्गे पंचवटी कारंजा, रविवार कारंजा, सांगली बँक सिग्नलवरून मेहेर सिग्नलमार्गे सीबीएस व तेथून त्र्यंबक नाका सिग्नलवरून गोल्फ क्लब मैदान.
दुसरा टप्पा : गोल्फ क्लब मैदानातून जलतरण तलावासमोरील रस्त्यावरून चांडक सर्कलमार्गे मुंबई नाका, तेथून इंदिरानगर बोगदा, पाथर्डी फाटा, पांडवलेणीपर्यंत.
आडगाव ते रविवार कारंजा परिसर
प्रवेश बंद :
– ९ वा मैल ते आडगाव डाव्या बाजूचा रस्ता
– डीमार्ट ते स्वामी नारायण चौक, तपोवन क्रॉसिंगपर्यंत
– संतोष टी पॉइंट ते मालेगाव स्टँडपर्यंत
पर्यायी मार्ग :
– आडगाव डीमार्ट ते तपोवन क्रॉसिंगपर्यंत एकेरी वाहतूक
– संतोषी टी पॉइंटकडील वाहतूक हिरावाडीमार्गे तारवाला नगर, पेठ नाक्यामार्गे अशोकस्तंभावरून गंगापूर नाक्यामार्गे इतरत्र
– संतोष टी पॉइंटवरून शालिमारकडे जाणारी वाहतूक तपोवन क्रॉसिंगमार्गे कन्नमवार पुलावरून ट्रॅक्टर हाउस, द्वारकामार्गे शालिमार
रविवार कारंजा ते इंदिरानगर परिसर
प्रवेश बंद :
– रविवार कारंजा, सांगली बँक सिग्नल, मेहेर, सीबीएस, गोल्फ क्लब, तरणतलाव, मुंबई नाका सर्व्हिसरोडपासून इंदिरानगर बोगदा हा रस्ता एका बाजूने बंद
पर्यायी मार्ग :
– पंचवटीकडून मालेगाव स्टॅँडमार्गे मखमलाबाद नाक्यावरून रामवाडीमार्गे जुना गंगापूर नाका
– अशोकस्तंभावरून रामवाडी पुलावरून पेठ फाटा
– नाशिकरोडकडील वाहने द्वारकामार्गे बसेस थेट कन्नमवार पुलावरुन पंचवटीत जातील
– सातपूरकडील वाहने शरणपूर सिग्नल, कॅनडा कॉर्नरमार्गे इतरत्र जातील
– सिटी सेंटर सिग्नलवरून इंदिरानगर जॉगिंग ट्रॅककडे जाणारी वाहने तिडके कॉलनीतून इतरत्र जातील
– बोधले नगर सिग्नलवरून इंदिरानगरकडे येणारी वाहने साईनाथ चौफुलीवरून इतरत्र जातील
इंदिरानगर ते विल्होळी परिसर
प्रवेश बंद :
– इंदिरानगर बोगदा ते विल्होळीपर्यंत महामार्गावरील सर्व्हिस रोड
पर्यायी मार्ग :
– इंदिरानगरकडून पाथर्डीकडे जाणारी वाहने अंबड बाजूच्या सर्व्हिसरोडचा वापर करतील
मोर्चा ज्या रस्त्यावरून मार्गस्थ होईल, ते रस्ते वाहतुकीसाठी बंद असतील. नागरिकांनी पर्यायी मार्गांचा वापर करावा. वाहतूक कोंडी टाळण्यासाठी पथकांना निर्देश दिले आहेत.- चंद्रकांत खांडवी, पोलिस उपायुक्त, वाहतूक