जिल्हाधिकारी जलज शर्मा यांनी गोदावरी-मराठवाडा पाटबंधारे विकास महामंडळाकडे केलेल्या पत्रव्यवहारानुसार जलसंपदा विभागाने महापालिकेसाठी गंगापूर धरणसमूहातून ३,८०७, दारणा धरणातून १००, तर मुकणे धरणातून १,४०७ असा एकूण ५,३१४ दशलक्ष घनफूट पाणीसाठा आरक्षित करण्याचा निर्णय घेतला आहे. परिणामी नाशिक शहराच्या पाणीआरक्षण मागणीत तब्बल ७८६ दशलक्ष घनफूट पाण्याची कपात झाली आहे. त्यामुळे महापालिकेने गत पाणी आरक्षण वर्षात शहरासाठी ५,७५० दशलक्ष घनफूट पाण्याचा वापर झाल्याने किमान तेवढे पाणी आरक्षण नाशिककरांसाठी उपलब्ध करून देण्याची मागणी केली. ती मागणीही फेटाळल्याने आता ५,३१४ दशलक्ष घनफूट पाणीच शहराला मिळणार आहे. त्यामुळे जुलै २०२४ अखेरपर्यंत पाणीपुरवठा करण्यासाठी तब्बल ४३६ दशलक्ष घनफूट पाण्याची तूट निर्माण झाली आहे.
नाशिककरांनो पाणी जपून वापरा; संपूर्ण शहराचा पाणीपुरवठा ‘या’ दिवशी राहणार बंद
‘शटडाऊन’आडून अघोषित कपात?

पाणीपुरवठा विभागाने पाणीकपातीचे नियोजन करीत आठवड्यातून एक दिवस संपूर्ण शहराचा पाणीपुरवठा बंद ठेवण्याचा प्रस्ताव तयार केला होता. शनिवारी शासकीय कार्यालये, तसेच औद्योगिक कामगारांना सुटी असते. त्यामुळे दर शनिवारी पाणीपुरवठा बंद ठेवल्यास नागरिकांना त्याचा कमी त्रास होईल, असे पाणीपुरवठा विभागातील अधिकाऱ्यांचे म्हणणे आहे. परंतु, या कपातीला विरोध झाल्याने हा प्रस्ताव बारगळला होता. त्यामुळे एकतर दररोज १० ते १५ टक्के कपात करायची किंवा दर शनिवारी ‘शटडाऊन’ करून छुपी कपात करण्याचा विचार आता पालिकेकडून केला जात आहे.

…अशी आहे स्थिती

-गतवर्षाचा पाणीवापर- ५७५० दलघफू
-दररोजचा पाणीवापर- १९.७५ दलघफू
-एकूण पाणी आरक्षणाचे दिवस-२९०
-एकूण आरक्षणाचे दिवस शिल्लक- २३०
-एकूण पाणी आरक्षण कपात- ७८६ दलघफू
-४३६ दशलक्ष घनफूट पाण्याची तूट
-एकूण पाणी तुटीचे दिवस- २१