शिवसेना भाजपमध्ये संघर्ष

शिवसेना शिंदे गट आणि भाजप जरी राज्यात युतीत एकत्र असले तरी कल्याणमध्ये दोन्ही पक्षांत आलबेल नसल्याचं चित्र पाहायला मिळतं. श्रीकांत शिंदे हेच कल्याणची जागा लढतील, असे संकेत देवेंद्र फडणवीस यांनी देऊनही कल्याणची जागा आम्हीच लढवू आणि जिंकूनही आणू, अशी थेट जाहीर भूमिका स्थानिक भाजप आमदार गणपत गायकवाड यांनी अनेकदा घेतलीये. तर कल्याणच्या जागेवरून कोणतेही वाद नाहीत. युतीत ही जागा शिवसेनेकडे असल्याने आमचा उमेदवार असेल, असं शिंदे गटाकडून सांगण्यात येतं.

भाजपचे कल्याण लोकसभा मतदारसंघात तीन आमदार असल्याने भाजपची ताकद आहे. त्यामुळेच इथे देवेंद्र फडणवीस यांचे निकटवर्तीय मंत्री रवींद्र चव्हाण यांना निवडणुकीला उतरविण्याचा मनसुबा असू शकतो. मंत्री रवींद्र चव्हाण आणि आमदार गणपत गायकवाड हे देवेंद्र फडणवीसांचे निकटवर्तीय नेते आहेत. रवींद्र चव्हाण डोंबिवलीमधून आणि गायकवाड हे कल्याण पूर्व मतदारसंघातून २००९, २०१४ आणि २०१९ च्या विधानसभा निवडणुकीत विजयी झाले आहेत. कल्याण लोकसभा मतदारसंघात भाजपचे ३ आमदार आहेत तर शिंदे गटाकडे १ आमदार आहे.

कल्याण लोकसभेत मनसेची भूमिका आणि मतं ठरणार निर्णायक

कल्याण लोकसभेत मनसेचा एक आमदार असून राज ठाकरे यांना मानणारा वर्ग मोठ्या प्रमाणात आहे. आजही राज ठाकरे यांची क्रेज टिकून राहिली आहे. मुंबईला लोकलमधून कामाला जाणारा मोठा वर्ग आहे. या वर्गाचे प्रश्न मनसे आमदार राजू पाटील नेहमी मांडत असतात. त्यामुळे ही जनता मनसेसोबत आहे. दुसरीकडे गेल्या अनेक वर्षापासून भाजप-शिवसेना सत्तेत असले तरी पाहिजे तसा विकास करु शकले नाहीत. त्यामुळेच मनसेने वारंवार विरोधात आवाज उठवल्याने मनसेने विरोधी पक्षाची स्पेस पूर्ण घेतली आहे. त्यामुळे कल्याण लोकसभेत मनसेची भूमिका आणि मतं किंगमेकर ठरणार आहेत.

मुख्यमंत्री शिंदे आणि मनसे अध्यक्ष राज ठाकरे यांच्यात मैत्रीपूर्ण संबंध आहेत. मात्र खासदार शिंदे आणि मनसे आमदार राजू पाटील यांच्या फारसे पटत नसल्याचे दिसून आले आहे. भाजपचे कॅबिनेट मंत्री रवींद्र चव्हाण यांनी कल्याण लोकसभेचे खासदार श्रीकांत शिंदे असतील, असे सांगितले होते. नंतर मनसेच्या दिव्या मधील कार्यकर्त्यांनी भावी खासदार लिहिलेला राजू पाटील यांच्या नावाने एक केक आणला. विशेष म्हणजे मनसे आमदार राजू पाटील यांनी तो केक कापला. तसेच उल्हासनगरमध्ये राजू पाटील यांचे भावी खासदार असे पोस्टर्स, बॅनर समाजमाध्यमातून व्हायरल झाले. त्यामुळे मनसे इथे उमेदवार देणार का? हे ही पाहावं लागेल.

‘मविआ’कडून उमेदवार कोण असू शकतो?

दुसरीकडे ठाकरे गटाच्या वतीने ही जागा लढविण्याचं पूर्णपणे प्लॅनिंग सुरू आहे. सुभाष भोईर यांना रिंगणात उतरवून लोकांना भावनिक साद घालण्याची खेळी ठाकरे गट करु शकतो. भोईर यांचा मतदारसंघात चांगला प्रभाव आहे.

कल्याण लोकसभा मतदार संघातील विधानसभा निहाय चित्र….

• कळवा- मुंब्रा : आमदार जितेंद्र आव्हाड (राष्ट्रवादी)
• कल्याण ग्रामीण : आमदार राजू पाटील (मनसे)
• डोंबिवली : आमदार रवींद्र चव्हाण (भाजप)
• कल्याण पूर्व : आमदार गणपत गायकवाड (भाजप)
• उल्हासनगर : आमदार कुमार आयलानी (भाजप)
• अंबरनाथ : आमदार बालाजी किणीकर (शिंदे गट)

कोण असू शकतात कल्याण लोकसभेसाठी उमेदवार

• शिवसेना (शिंदे गट )- खा. डॉ. श्रीकांत शिंदे
• भाजप- कॅबिनेट मंत्री रवींद्र चव्हाण
• महाविकास आघाडी- माजी आमदार सुभाष भोईर किंव्हा आमदार जितेंद्र आव्हाड
• मनसे- आमदार राजू पाटील