म. टा. वृत्तसेवा, नवी मुंबई : महापालिका अधिकारी-कर्मचाऱ्यांसाठी सहा दिवसांचा आठवडा पाच दिवसांवर आणण्यात आला आहे. त्यानुसार, या पाच दिवसांतील कार्यालयीन वेळा वाढवण्यात आल्या आहेत. मात्र असे असतानाही अनेक महापालिका अधिकारी, कर्मचारी हे उशिरा कार्यालयात येऊन लवकर कार्यालयातून बाहेर जात आहेत. याचा परिणाम महापालिका कामकाजावर होत आहे. नागरिकांची कामेही होत नाहीत. याची गंभीर दखल नवी मुंबई महापालिका आयुक्त राजेश नार्वेकर यांनी घेतली आहे. कार्यालयीन वेळा न पाळल्यास शिस्तभंगाच्या कारवाईला सामोरे जावे लागेल, असा इशारा आयुक्तांनी दिला आहे. या आशयाचे परिपत्रक पालिका आयुक्तांच्या वतीने काढण्यात आले आहे.

राज्यातील सरकारी कर्मचाऱ्यांसाठी लागू करण्यात आलेला पाच दिवसांच्या आठवड्याचा नियम नवी मुंबई महापालिकेतील अधिकारी, कर्मचाऱ्यांनाही लागू करण्यात आला आहे. त्यानुसार कार्यालयीन कामकाजाची वेळ सोमवार ते शुक्रवार सकाळी ९.४५ ते संध्याकाळी ६.१५ ही ठेवण्यात आली आहे. तर, शिपाई या संवर्गासाठी ही वेळ सकाळी ९.३० ते संध्याकाळी ६.३० करण्यात आली आहे. या वेळा अधिकारी आणि कर्मचाऱ्यांनी पाळणे बंधनकारक असताना अनेक कर्मचारी या वेळेच्या अगोदरच कार्यालय सोडत असल्याचे निदर्शनास आले होते. अधिकारी, कर्मचाऱ्यांनी कार्यालयाच्या वेळा पाळाव्यात, यासाठी ‘नवी मुंबई सिटिझन फोरम’ने कर्मचाऱ्यांच्या हजेरी वेळा बायोमेट्रिक पद्धतीने जोडण्याची मागणी केली होती. यासाठी पाठपुरावाही केला होता.
पदोन्नतीचं घोडं नेमकं अडलं तरी कुठं? १७ वर्षांपासून १९४ जण उपजिल्हाधिकाऱ्यांच्याच खुर्चीत
महापालिकेतील अधिकारी, कर्मचाऱ्यांना कार्यालयीन वेळ पाळणे तसेच, त्यांची हजेरी बायोमेट्रिक पद्धतीने नोंदवणे अनिवार्य करण्यात आले आहे. त्याप्रमाणे महापालिका मुख्यालय आणि क्षेत्रीय कार्यालयातील अधिकारी, कर्मचाऱ्यांनी कार्यालय सोडत असताना नोंदवहीत याची नोंद केल्याशिवाय कार्यालय सोडू नये, असे सांगण्यात आले आहे. तसेच, जे अधिकारी, कर्मचारी कार्यालय कामकाजाची वेळ पाळणार नाहीत, अशांवर विभाग प्रमुखांना कारवाई करण्याचे अधिकारही दिले आहेत. मात्र असे असूनही अनेक अधिकारी-कर्मचारी कार्यालयीन वेळेत उपस्थित राहात नाहीत. त्यामुळे कार्यालयाच्या कामकाजावर परिणाम होत आहे. त्यामुळे जे कर्मचारी वेळा पाळणार नाहीत, त्यांच्यावर शिस्तभंगाची कारवाई करून त्या बाबतचा अहवाल संबंधित विभाग प्रमुखांनी सामान्य प्रशासनाला सादर करावा, असे पालिका आयुक्तांनी स्पष्ट केले आहे.

नवी मुंबई महापालिका, सिडको आणि कोकण भवनमधील कार्यालयांचा कारभार हा जनतेच्या पैशाने चालवला जात असल्याने नागरिकांची कामे वेळेत होण्यासाठी त्या त्या कार्यालयातील कर्मचारी, अधिकाऱ्यांनी कार्यालयीन वेळेत हजर असायलाच हवेत. कार्यालयीन वेळेत शिस्तपालन केले जात आहे की नाही, हे जनतेला कळण्यासाठी सर्व कार्यालयांनी कर्मचाऱ्यांच्या बायोमेट्रिक हजेरीची माहिती आपल्या कार्यालयाच्या वेबसाइटवर उपलब्ध करावी. कर्मचारी, अधिकाऱ्यांचे वेतन थेट बायोमेट्रिक हजेरीशी जोडावे.- सुधीर दाणी, प्रवर्तक, अलर्ट सिटिझन्स फोरम, नवी मुंबई