ठाणे : ‘वडाळा – घाटकोपर – कासारवडवली’ या मेट्रो चार प्रकल्पाचे काम सध्या ठाण्यात प्रगतीपथावर असून येथील मेट्रोच्या कामादरम्यान २० ते २५ फुटांवरून कोसळून कामगाराचा मृत्यू झाल्याची घटना बुधवारी दुपारी घडली. या दुर्घटनेत कामगाराचा जागीच मृत्यू झाला. त्याची ओळख अद्याप पटलेली नसून घटनेची माहिती मिळताच पोलिसांनी घटनास्थळी धाव घेतली आहे. या अपघाताने मुंबईहून ठाण्याकडे येणाऱ्या वाहिनीवर वाहनांची कोंडी झाली होती.
ठाण्यात एलबीएस मार्ग, तीन हात नाका, पूर्व दृतगती महामार्ग ते थेट घोडबंदर रोडवर मेट्रोचे काम सुरु आहे. मेट्रो स्थानक उभारणे, गर्डर बसवणे, खांबांची उभारणी या कामादरम्यान अपघात घडण्याची मालिका कायम आहे. तीन हात नाक्याजवळ मर्फी आरटीओ कार्यालयासमोर मेट्रो स्थानकाचे काम सुरु असून याठिकाणी उंचावरून कोसळल्याने कामगाराचा मृत्यू झाला.
ठाण्यात एलबीएस मार्ग, तीन हात नाका, पूर्व दृतगती महामार्ग ते थेट घोडबंदर रोडवर मेट्रोचे काम सुरु आहे. मेट्रो स्थानक उभारणे, गर्डर बसवणे, खांबांची उभारणी या कामादरम्यान अपघात घडण्याची मालिका कायम आहे. तीन हात नाक्याजवळ मर्फी आरटीओ कार्यालयासमोर मेट्रो स्थानकाचे काम सुरु असून याठिकाणी उंचावरून कोसळल्याने कामगाराचा मृत्यू झाला.
या अपघाताने कामगारांच्या सुरक्षेवरच प्रश्नचिन्ह निर्माण झाले आहे. कामगार खाली कोसळताच याठिकाणी नागरिकांची एकच गर्दी उसळली. तसेच पूर्व दृतगती महामार्गाशेजारीच ही घटना घडल्याने मुंबईहून ठाण्याच्या दिशेने येणारी वाहने खोळंबली होती. या वाहनांच्या रांगा कोपरी उड्डाणपुलापर्यंत गेल्या होत्या.
अपघातांची मालिका कायम
सहा महिन्यांपूर्वी मेट्रोच्या कामादरम्यान तीन हात नाका येथे १५ ते २० फुट उंचावरून एक लोखंडी सळई रस्त्यावरुन जाणाऱ्या कारमध्ये आरपार उभी शिरली होती. वाहन चालकापासून अवघ्या काही इंच अंतरावर ही सळई पडल्याने वाहन चालक आणि प्रवाशांचा जीव तेव्हा थोडक्यात बचावला होता. मात्र या घटनेमुळे मेट्रोच्या कामादरम्यान होणाऱ्या अपघातांचा प्रश्न पुन्हा एकदा ऐरणीवर आला.