म. टा. प्रतिनिधी, पुणे : राज्य मागासवर्ग आयोगाकडून ज्या पद्धतीने काम करणे अपेक्षित होते. त्या पद्धतीने काम होत नसल्याने मुख्यमंत्री एकनाथ शिंदे नाराज आहेत, अशी प्रतिक्रिया राज्याचे गृहनिर्माण तसेच ओबीसी मंत्री अतुल सावे यांनी दिली.
पुणे गृहनिर्माण क्षेत्र विकास प्राधिकरणाच्या (म्हाडा) पुणे विभागाच्या पाच हजार ८६३ सदनिकांच्या ऑनलाइन सोडत गृहनिर्माण मंत्री सावे यांच्या हस्ते झाली. त्यानंतर ते पत्रकारांशी बोलत होते.
पुणे गृहनिर्माण क्षेत्र विकास प्राधिकरणाच्या (म्हाडा) पुणे विभागाच्या पाच हजार ८६३ सदनिकांच्या ऑनलाइन सोडत गृहनिर्माण मंत्री सावे यांच्या हस्ते झाली. त्यानंतर ते पत्रकारांशी बोलत होते.
त्यावेळी राज्य मागासवर्ग आयोगाचे सदस्य राजीनामा देत आहे याबाबत विचारता ओबीसी मंत्री अतुल सावे म्हणाले, ‘राज्य मागासवर्ग आयोगाकडून मराठा आरक्षणावर ज्या पद्धतीने काम होणे अपेक्षित आहे, ते होत नसल्याने मुख्यमंत्री एकनाथ शिंदे यांनी नाराजी व्यक्त केली आहे. त्यामुळे सदस्यांनी आयोगाच्या सदस्यत्वाचा राजीनामा दिला आहे. दुसरे सदस्य मिळून काम करतील असे वाटते. दुसरीकडे, सुप्रीम कोर्टात केस सुरू आहे. आरक्षणाला साच्यात बसवून कशा पद्धतीने आरक्षण देता येईल यासाठी मुख्यमंत्री प्रयत्न करीत आहेत. त्याला नक्कीच यश मिळेल.’
मराठा समाजाचेच सर्वेक्षण होणार; राज्य मागासवर्ग आयोगाचा सरकारकडे प्रस्ताव, मतभेदांवरून एका सदस्याचा राजीनामा
तीन राज्यांमध्ये भाजपाची सत्ता आली त्याबाबत विचारता अतुल सावे यांनी मत व्यक्त केले. ‘ मोदी हे २०१४ मध्ये देशाचे पंतप्रधान झाले. गेल्या दहा वर्षात देशाच्या विकासासाठी त्यांनी केलेल्या कामावर विश्वास ठेऊन नागरिकांनी मतदान केले. मतदानाची टक्केवारी वाढली आहे. मध्यप्रदेश, राजस्थान आणि छत्तीसगड येथे मतदारांनी भाजपच्या पारड्यात मते टाकल्याने विजय मिळाला. तेलंगणाच्या जागा कमी आल्या असल्या तरी तेथे मतदानाचा टक्का वाढला आहे. त्यामुळे मोदींच्या नेतृत्वावर नागरिकांनी दाखविलेल्या विश्वासामुळे येणाऱ्या लोकसभा तसेच महाराष्ट्राच्या विधानसभा निवडणुकीत आम्हाला यश मिळेल,’ असा विश्वास त्यांनी व्यक्त केला.
पुणे विभागात म्हाडाच्या पाच हजार ८६३ घरांची ऑनलाइन लॉटरीची सोडत झाली आहे. आठ जणांना थेट घर मिळाल्याचे पत्र देण्यात आले आहे, असेही त्यांनी सांगितले.