मुंबई आग्रा महामार्ग लगत वाहन तोडीचा काळाबाजार अवैधपणे सुरू असल्याची माहिती अप्पर पोलीस अधीक्षक किशोर काळे यांना मिळाली. त्यानुसार त्यांनी पोलीस अधीक्षक श्रीकांत धिवरे यांच्या निदर्शनास ही बाब आणून दिली. यानंतर मोहाडी पोलीस ठाण्याचे पोलिस निरीक्षक शशिकांत पाटील यांच्या पथकाने मुंबई आग्रा महामार्गातील लगत असलेल्या या संबंधित केंद्रावर छापा टाकला. या छाप्यात सुमारे वीस ते बावीस दुकानांच्या परिसरामध्ये अर्धवट तोडलेल्या चार चाकी वाहनांचे सुटे भाग आढळून आले.
पोलिसांनी टाकलेल्या या छाप्यामध्ये चेसीससह भंगार साहित्य मोठ्या प्रमाणात आढळून आले. मोहाडी पोलिसांच्या या पथकाने संबंधित दुकान मालकांची चौकशी केली असता त्यांच्याकडे स्क्रॅप करण्याचे अधिकृत कागदपत्रे आढळून आले नाही. त्याचप्रमाणे या दुकान मालकांनी समाधानकारक खुलासाही केला नाही. त्यामुळे घटनास्थळावरून सुमारे ७७ लाखांचा ऐवज जप्त करण्यात आला असून वीस ते बावीस दुकान मालकांविरोधात भादवी कलम ३७९ ,४११,३४ अन्वये गुन्हा दाखल करण्यात आला आहे.
या कारवाईमुळे धुळे शहरात एकच खळबळ उडाली असून महामार्गालगत वाहन तोडीचा काळाबाजार सुरू असल्याचे पुन्हा एकदा उघडकीस आले आहे. महामार्गालगत ट्रक तोडण्याचा काळाबाजार पुन्हा एकदा ऐरणीवर आला आहे. मात्र आज पुन्हा धुळे पोलिसांनी या ट्रक तोडण्याच्या रॅकेट चालवणाऱ्यांना कारवाई मधून तडाखा दिला आहे. यातून प्रादेशिक परिवहन विभागाच्या कामावर देखील प्रश्नचिन्ह निर्माण झाले आहे.
Read Latest Maharashtra News And Marathi News