‘सध्या ईशान्य मौसमी वाऱ्यांचा ऋतू आहे. त्यामुळे राज्यातही पूर्व ते ईशान्य भागातून वारे वाहत आहेत. परिणामी किनारपट्टीवरील वातावरण तापलेले आहे. या आठवडाअखेरपर्यंत मुंबईचे कमाल तापमान ३५ ते ३७ अंशांदरम्यान राहण्याची शक्यता आहे’, अशी माहिती प्रादेशिक हवामान विभाग अधिकारी सुषमा नायर यांनी दिली.

१६ नोव्हेंबरला पश्चिमेकडून वारे येऊ शकतात, मात्र हा दिलासा फार काळ टिकणार नाही. १९ आणि २० नोव्हेंबरला पुन्हा थोडे ढगाळ वातावरण झाले तर कमाल तापमान थोडे उतरू शकेल. पण हे तापमान फार खाली जाण्याची शक्यता नाही. सध्या आभाळही निरभ्र असल्याने सूर्यकिरणे थेट जमिनीपर्यंत पोहोचून वातावरणात उष्म्याची जाणीव अधिक होत आहे.

भारतीय हवामान विभागाने दिलेल्या माहितीनुसार, नोव्हेंबरमध्ये मुंबईच्या कमाल तापमानाचा पारा ३७ अंशांच्या पुढेही नोंदला गेला आहे. सन २०१८ मध्ये ३७.६ सन २०१४ मध्ये ३७ तर सन २०११ मध्ये ३६.८ अंश सेल्सिअस कमाल तापमानाची सांताक्रूझ येथे नोंद झाली होती. सोमवारी केवळ मुंबईत नाही तर अलिबाग, रत्नागिरी येथेही कमाल तापमान ३५.८ असे चढे होते. हे तापमान सरासरीपेक्षा २ अंशांहून अधिक होते.

थंडीची चाहूल डिसेंबर मध्यानंतरच

सध्या कोकण विभाग वगळता उर्वरित महाराष्ट्रात ३१ ते ३३ अंशांदरम्यान कमाल तापमान असू शकेल, तर उत्तर महाराष्ट्रात १६ ते १८ अंशांदरम्यान किमान तापमान असू शकते; पण हा दिलासा दीर्घ काळ मिळण्याची शक्यता सध्या नाही. ईशान्य मान्सून डिसेंबरमध्ये परतल्यानंतर मग उत्तरेकडून वारे वाहायला सुरुवात होईल. राज्यात त्यानंतरच थंडीचा ऋतू जाणवू शकेल.

Read Latest Mumbai Updates And Marathi News