येत्या एक डिसेंबरपासून प्रत्येक गावात मराठा आरक्षणासाठी साखळी उपोषण सुरू होणार आहे. या मोहिमेबाबतही जरांगे यांनी भूमिका मांडली. ‘मराठा समाजाला मोठी लढाई जिंकायची आहे. त्यामुळे कुणीही आत्महत्या करू नका. जिवंत राहूनच लढाई करायची आहे. २४ डिसेंबरनंतर होणाऱ्या आंदोलनाची तयारी करावी. कुणीही आंदोलनात उद्रेक करायचा नसून एक डिसेंबरपासून प्रत्येक गावात ताकदीने साखळी उपोषण करायचे आहे. गावागावात साखळी उपोषण सुरू राहिले पाहिजे. मुलांचे हित जोपासताना पक्ष आणि नेते यांच्याकडे दुर्लक्ष करा’, असे जरांगे म्हणाले.

जुन्या संस्थानातील दप्तरात कुणबी नोंदीचे दस्तावेज मिळाल्यास गोरगरिबांचे कल्याण होईल. समिती आल्यास संस्थानांनी कागदपत्रे उपलब्ध करावी, असे जरांगे म्हणाले. दरम्यान, अंतरवाली येथील उपोषण सोडल्यानंतर मागील बारा दिवसांपासून जरांगे यांच्यावर छत्रपती संभाजीनगर येथील खासगी रुग्णालयात उपचार सुरू आहेत. त्यांना रविवार, १२ नोव्हेंबर रोजी सकाळी रुग्णालयातून डिस्चार्ज मिळणार आहे. त्यापूर्वी जरांगे यांनी शनिवारी रात्री देवगाव रंगारी, कोलठाण, गोपालपूर, कुबेर गेवराई येथे भेटीगाठी घेतल्या. रविवारी सकाळी जरांगे अंतरवालीकडे रवाना होणार आहेत.

महसूलमंत्री राधाकृष्ण विखे पाटील यांनी शनिवारी सायंकाळी मनोज जरांगे यांची रुग्णालयात भेट घेतली. ७ ते २२ डिसेंबर या कालावधीत हिवाळी अधिवेशन आहे. राज्याचा कुणबी नोंदींचा अहवाल तयार आहे. दोन दिवसांचे विशेष अधिवेशन घेऊन आरक्षणाचा ठराव पारित करावा, अशी मागणी जरांगे यांनी केली. अहवाल तयार असल्याने अडचण येणार नाही. सरकार योग्य तो निर्णय घेईल, असे विखे म्हणाले. आंदोलकांवरील गुन्हे मागे घेण्याची विनंतीही जरांगे यांनी केली. बीड जिल्ह्यात तीन हजार लोकांची विनाकारण चौकशी केली. अनेकांना मारहाण करण्यात आली. जिल्हा प्रशासन मोठे की राज्य सरकार मोठे ? साखळी उपोषण करणाऱ्यांवर दहशत का निर्माण करीत आहेत, असा सवाल जरांगे यांनी केला.