पुढील दोन दिवसात सर्व शेतकऱ्यांच्या खात्यात हि रक्कम जमा होणार आहे. शेतकऱ्यांना आंबा आणि काजू पीक विम्याची रक्कम दिली जात नसल्याने आमदार वैभव नाईक व जिल्हा बँक माजी अध्यक्ष सतीश सावंत यांनी १ नोव्हेंबर रोजी जिल्हा कृषी अधिक्षक कार्यालयाला टाळे ठोको आंदोलन करण्याचा इशारा दिला होता. त्या पार्श्वभूमीवर सिंधुदुर्ग जिल्हा कृषी अधीक्षक विजयकुमार राऊत यांनी कणकवली विजय भवन येथे वैभव नाईक आणि सतीश सावंत यांच्या समवेत बैठक घेऊन नोव्हेंबरच्या दुसऱ्या आठवड्यात संबंधित सर्व पात्र बागायतदारांच्या बँक खात्यात विमा कंपनीकडून विमा नुकसान भरपाई जमा करण्याची ग्वाही दिली होती. तसे लेखी पत्र विजयकुमार राऊत यांनी देत आंदोलन मागे घेण्याची विनंती केली. त्यानुसार पीक विम्याचे पैसे शेतकऱ्यांच्या खात्यात जमा होत असल्याने शेतकरी आनंदित झाले आहेत.

जिल्ह्यातील आंबा काजू फळबागायदारांना नुकसान भरपाई मिळावी, म्हणून गेले काही महिने प्रशासन आणि शासनावर स्तरावर जोरदार संघर्ष सुरू होता. आमदार वैभव नाईक हे जिल्ह्यातील बागाईदारांना नुकसान भरपाई मिळावी यासाठी कृषी मंत्र्यांची वारंवार भेट घेऊन पाठपुरावा करत होते. थकलेल्या नुकसान भरपाईमुळे जिल्ह्यातील शेतकरी हा मेटाकुटीला आला होता. नुकसान भरपाई कधी मिळणार याकडे सर्वांचे लक्ष लागून राहिलं होतं. मात्र अखेर ही नुकसान भरपाई मिळायला सुरुवात झाली आहे. त्यामुळे सिंधुदुर्गातील शेतकऱ्यांची दिवाळी ही मात्र गोड झाल्याची पाहायला मिळत आहे. आंबा आणि काजू फळ पीक विम्याची प्रलंबित रक्कम शेतकऱ्यांना मिळण्यासाठी आमदार वैभव नाईक आणि जिल्हा बँक माजी अध्यक्ष सतीश सावंत यांनी माहिती दिली.