म. टा. वृत्तसेवा, नाशिकरोड : नाशिककरांसाठी पुण्याला जाण्याकरिता स्वस्त-मस्त आणि सुरक्षित असलेली पुणे-नाशिक-भुसावळ हुतात्मा एक्स्प्रेस रेल्वेगाडी आता अमरावतीला पळविण्यात आल्याने नाशिककरांनी तीव्र संताप व्यक्त केला आहे.
पूर्वी पुण्याला रेल्वेने जाण्यासाठी नाशिककरांना मनमाड किंवा कल्याण गाठावे लागायचे. नाशिककरांच्या अथक प्रयत्नांनंतर पुणे-नाशिक-भुसावळ रेल्वेगाडी सुरू झाली. एसटी, खासगी प्रवासी गाड्यांच्या तुलनेत या गाडीचे तिकीटदर नगण्य होते. मात्र, घाटातील व्यस्त मार्गाचे कारण देत ही गाडी गेल्या जानेवारीपासून बंद करण्यात आली. त्यामुळे उत्तर महाराष्ट्रातील प्रवासी, उद्योजक, विद्यार्थी, शेतकरी आदींचे हाल होत होते. त्यातच आता पुणे-भुसावळ (११०२६/२५) ही गाडी दौंड, अहमदनगर, मनमाडमार्गे अमरावतीपर्यंत नेण्यात येणार आहे. रेल्वे मंत्रालयाने त्याला मंजुरीही दिली आहे. पुणे-भुसावळऐवजी ही गाडी आता पुणे-अमरावती अशा नावाने धावणार आहे. उरळी, दौंड कोरड, अहमदनगर, बेलापूर, कोपरगाव, मनमाड, चाळीसगाव, पाचोरा, जळगाव, भुसावळ, मलकापूर, शेगाव, अकोला, बडनेरा येथे ती थांबेल, असे रेल्वे बोर्डाचे संयुक्त संचालक संजय नीलम यांनी काढलेल्या पत्रकात नमूद केले आहे.
पूर्वी पुण्याला रेल्वेने जाण्यासाठी नाशिककरांना मनमाड किंवा कल्याण गाठावे लागायचे. नाशिककरांच्या अथक प्रयत्नांनंतर पुणे-नाशिक-भुसावळ रेल्वेगाडी सुरू झाली. एसटी, खासगी प्रवासी गाड्यांच्या तुलनेत या गाडीचे तिकीटदर नगण्य होते. मात्र, घाटातील व्यस्त मार्गाचे कारण देत ही गाडी गेल्या जानेवारीपासून बंद करण्यात आली. त्यामुळे उत्तर महाराष्ट्रातील प्रवासी, उद्योजक, विद्यार्थी, शेतकरी आदींचे हाल होत होते. त्यातच आता पुणे-भुसावळ (११०२६/२५) ही गाडी दौंड, अहमदनगर, मनमाडमार्गे अमरावतीपर्यंत नेण्यात येणार आहे. रेल्वे मंत्रालयाने त्याला मंजुरीही दिली आहे. पुणे-भुसावळऐवजी ही गाडी आता पुणे-अमरावती अशा नावाने धावणार आहे. उरळी, दौंड कोरड, अहमदनगर, बेलापूर, कोपरगाव, मनमाड, चाळीसगाव, पाचोरा, जळगाव, भुसावळ, मलकापूर, शेगाव, अकोला, बडनेरा येथे ती थांबेल, असे रेल्वे बोर्डाचे संयुक्त संचालक संजय नीलम यांनी काढलेल्या पत्रकात नमूद केले आहे.
आता रस्तामार्गेच प्रवास…
पुणे-नाशिक-भुसावळ हुतात्मा एक्स्प्रेस पुणे-भुसावळ-पुणे व्हाया नाशिक, पनवेल, कर्जत अशी धावत असे. पावसाळ्यात खंडाळा, लोणावळा यांसारखा निसर्गरम्य परिसर पाहून मन प्रफुल्लित व्हायचे. आता या एक्स्प्रेसचा मार्गच बदलून भुसावळच्या पुढे अमरावतीपर्यंत विस्तारित करण्यात आला आहे. ही गाडी कमी अंतरावरून पुण्याला पोहोचेल. तथापि, नाशिकरोड, लासलगाव, निफाड, कल्याण, पनवेल ते पुणे लिंकवरील प्रवाशांच्या आणि विशेषत: नाशिक-पुणेदरम्यान प्रवास करणाऱ्या प्रवाशांना गाडीच राहणार नाही. आता रस्तामार्गे सहा तासांचा दगदगीचा, कंटाळवाणा, असुरक्षित प्रवास करूनच पुण्याला जावे लागणार आहे.
…या गाड्या पळविल्या
आतापर्यंत नाशिकच्या पाच गाड्या पळविण्यात आलेल्या आहेत. मुंबई-नांदेड तपोवन एक्स्प्रेस नाशिकसाठी सुरू करण्यात आली होती. ती नांदेडमध्ये नेण्यात आल्याने नाशिककरांना जागाच मिळत नाही. पुण्यासारख्या शैक्षणिक आणि नाशिकसारख्या आध्यात्मिक शहरांना जोडण्यासाठी पुणे-नाशिक गाडी सुरू करण्यात आली. मात्र, तीदेखील भुसावळपर्यंत नेण्यात आली. पंचवटीचा ताण कमी करण्यासाठी राज्यराणी सुरु करण्यात आली. २०१८ मध्ये ती थेट नांदेडपर्यंत नेण्यात आली. मनमाड-कुर्ला गोदावरी एक्स्प्रेसला मोठा प्रतिसाद असूनही प्रवासी नसल्याचे कारण देत रेल्वेने ती कायमची रद्द केली. नाशिककरांच्या दबावामुळे २०२२ मध्ये चाचणीतत्त्वावर दादर-मनमाड नावाने ती सुरू करण्यात आली. पुढे ती धुळ्यापर्यंत नेण्यात आली. सर्व पॅसेंजर बंद करून मेमू सुरू करण्यात आली. मात्र, देवळाली-भुसावळ पॅसेंजर ही स्वस्त गाडी मेमू झाल्याने प्रवाशांना परवडत नाही.
पुण्याला जाण्यासाठी ही एकमेव गाडी होती. नाशिककरांनी तीव्र संघर्ष करून ती मिळविली होती. कल्याण, पनवेलपर्यंत जाणाऱ्या प्रवाशांची मोठी सोय झाली होती. पुणे-अमरावती ही गाडी मनमाड, दौंड, नगर मार्गाएवजी पूर्वीप्रमाणेच नाशिक-कल्याण-पनवेलमार्गे सोडावी.-किरण बोरसे, सदस्य, विभागीय रेल्वे सल्लागार समिती
नाशिककर हक्काने रेल्वे गाड्या मिळवतात. मात्र, राजकीय इच्छाशक्तीअभावी अन् गॉडफादरअभावी त्या पळविल्या जातात. ‘पंचवटी’तील देवीच्या आरतीसाठी, ‘गोदावरी’त गणेशोत्सवासाठीही यंदा संघर्ष करावा लागला होता. संबंधित घटकांची उदासीनताच याला कारणीभूत ठरत आहे.-राजेश फोकणे, अध्यक्ष, रेल्वे वेल्फेअर असोसिएशन