दोन्हीही पाणी योजनेत वारंवार निर्माण होणाऱ्या बिघाडामुळे शहराचा पाणीपुरवठा संकटात सापडला आहे. सिडको एन ५ च्या जलकुंभातील पंपहाउसमधील साठ अश्वशक्तीचा पंप आठ दिवस नादुरुस्त होता. त्यामुळे सिडको-हडको भागातील पाणीपुरवठा पूर्णपणे विस्कळित झाला आहे. आठ ते दहा दिवसांआड या भागात पाणीपुरवठा होऊ लागला आहे. या पंपाच्या दुरुस्तीचे काम होत असतानाच जायकवाडी येथील पंपहाउसमधील ४९० अश्वशक्तीचा एक पंप नादुरुस्त झाला. त्याच्या दुरुस्तीसाठी पालिकेला तीन दिवस झगडावे लागले आहे. हा पंप बिघडल्यामुळे जायकवाडी धरणातून उपया होणाऱ्या पाण्यात सुमारे दहा एमएलडी पाण्याची घट झाली. पालिकेच्या यांत्रिकी विभागाचे कार्यकारी अभियंता डी.के. पंडित यांनीच ही माहिती दिली आहे.
जायकवाडी धरणात पाणी सोडण्यास विलंब; प्रशासकीय दिरंगाईने पाण्याची ३० टक्के हानी
पंडित यांच्या माहितीनुसार ५६ एमएलडीच्या योजनेतून ३८ एमएलडी पाण्याचा उपसा जायकवाडी धरणातून होतो, तर १०० एमएलडीच्या योजनेतून ९० एमएलडीपर्यंत पाण्याचा उपसा केला जात आहे. दोन्हीही योजनांमधून १२८ ते १३० एमएलडी पाण्याचा उपसा होत असून छत्रपती संभाजीनगर शहरात पाणी येईपर्यंत सुमारे ११० एमएलडी पाणीच मिळते, मिळणाऱ्या या पाण्यातून शहरात वितरण केले जाते. नवीन पाणीपुरवठा योजनेसाठी केलेल्या सर्वेक्षणानुसार शहराचा विस्तार आणि लोकसंख्या लक्षात घेता रोज किमान २६० एमएलडी पाण्याची गरज आहे. बिघाडांच्या सत्रामुळे केवळ ११० एमएलडी पाणीच उपलब्ध होत आहे. १५० एमएलडी पाण्याची तूट असून, नवीन योजना कार्यान्वीत होईपर्यंत ही तूट भरून निघणार नाही हे स्पष्ट झाले आहे.