झुंबर गांगुर्डे पत्नी व लहान मुलगा अमोलसोबत देवदर्शनासाठी गेले होते. त्यांचा मोठा मुलगा विकास व मधला मुलगा आकाश घरीच होते. झुंबर गांगुर्डे यांचा राजीवनगर परिसरात मत्स्य विक्रीचा व्यवसाय होता. त्यांची पत्नी सारिका गांगुर्डे लेखानगर येथील फर्निचरच्या दुकानात काम करीत होत्या. तिघेही मुले खासगी कंपनीत कामास होती. मात्र, या दुर्घटनेत आई-वडील व लहान भाऊ देवाघरी गेल्याने विकास व आकाश हे दोघे भाऊच या कुटुंबात उरले असून, २२ वर्षीय विकासवरच सर्व जबाबदारी आल्याने आप्तांना गलबलून आले होते.

कष्टाळू महिलांच्या जाण्याने हळहळ

राजीवनगर वसाहतीतील रंजना रमेश जगताप (वय ४७) यांचाही या अपघातात जागीच मृत्यू झाला. रंजना जगताप यांच्या पतीचे काही वर्षांपूर्वी निधन झाले होते. त्यांचा मुलगा विशाल याचा काही दिवसांपूर्वी विवाह झालेला आहे. त्या लेखानगर येथील फर्निचरच्या दुकानात काम करीत होत्या. गौळाणे गाव येथील रजनी गौतम तपासे (वय ३२) यांच्यावरही काळाने घाला घातला, तर त्यांचे पती गौतम तपासे जखमी झाले. रजनी व गौतम तपासे हे दाम्पत्य देवदर्शनासाठी गेले होते. रजनी यांच्या पश्चात पती, दहा वर्षांचा मुलगा, तर बारा वर्षांची मुलगी आहे. गौतम तपासे यांच्यावर शासकीय रुग्णालयात उपचार सुरू आहेत. मोलमजुरी करणाऱ्या कष्टाळू महिलांच्या जाण्याने परिसरात हळहळ व्यक्त करण्यात येत होती.

राजीवनगर परिसरावर शोककळा

अपघातात राजीवनगर वसाहतीतील चार जणांचा मृत्यू झाल्याची दुर्दैवी घटना समजल्यावर रविवारी सकाळपासूनच संपूर्ण राजीवनगर परिसरावर शोककळा पसरली होती. दुपारी अडीचच्या सुमारास मृतदेह राजीवनगरात आणण्यात आल्यानंतर त्या ठिकाणी मोठी गर्दी जमली होती. मृतांच्या आप्तांना मृतदेह पाहून अश्रू अनावर झाले होते. देवदर्शनाहून परतत असताना असा प्रसंग घडल्याने परिसरातील रहिवाशांकडून हळहळ व्यक्त केली जात होती.

मोरवाडी स्मशानभूमीत गर्दी

राजीवनगर येथील मृत्यू झालेल्या गांगुर्डे कुटुंबातील तीन सदस्यांसह रंजना जगताप यांचा अंत्यविधी मोरवाडी येथील स्मशानभूमीत झाला. त्यावेळी परिसरातील शेकडो नागरिक उपस्थित होते. राजकीय, सामाजिक क्षेत्रांतील विविध मान्यवरांनी यावेळी मृतांना श्रद्धांजली वाहिली.

विरोधी पक्षनेते दानवेंनी घेतली माहिती

वैजापूर येथील भीषण अपघातात ठार झालेले बारा जण नाशिकचे असल्याची माहिती विरोधी पक्षनेते अंबादास दानवे यांना मध्यरात्री समजताच त्यांनी शिवसेना (ठाकरे गट) महानगरप्रमुख सुधाकर बडगुजर यांना ही माहिती कळविली. त्यावरून शिवसैनिकांकडून वडाळा, इंदिरानगर भागातील नागरिकांना घटनेबाबत विचारणा सुरुवात केली. त्यानंतर राजीवनगर परिसरातील पाच जण सैलानीबाबांच्या दर्शनासाठी गेल्याचे समजले. त्यानंतर त्यांना धीर देण्याचे काम शिवसैनिकांनी केले. दानवेही त्यांच्या संपर्कात होते.