म. टा. विशेष प्रतिनिधी, मुंबई : जुहू जंक्शनवर होणाऱ्या वाहतूककोंडीवर उपाय करण्यासाठी अंधेरीतील सी. डी. बर्फीवाला रोड ते जुहू-वर्सोवा रोड दरम्यान मेट्रो २ मार्गिकेच्याखाली नवीन उड्डाणपूल बांधण्याचा महापालिका विचार करत आहे. याचा अभ्यास करण्यासाठी आयआयटी, मुंबई या संस्थेची नेमणूक महापालिका प्रशासनाने केली आहे. विमानतळ प्राधिकरणाच्या जागेतून हा पूल प्रस्तावित आहे. मात्र या ठिकाणी उंचीला मर्यादा असल्याने नवीन पर्यायांची चाचपणी केली जाणार आहे.
अंधेरी पश्चिम येथील जुहू-वर्सोवा रोड, जुहू जंक्शन परिसरात मोठ्या प्रमाणात वाहतूककोंडी होते. दहा ते पंधरा मिनिटांच्या अंतरासाठी वाहनचालकांना अर्धा ते एक तास लागतो. मेट्रो मार्गामुळे अंधेरीहून घाटकोपर व डी. एन. नगर ते दहिसर जाणे सुसह्य झाले असले तरी रस्तेमार्गे प्रवासासाठी वाहनचालकांची दमछाक होते. यावर पर्याय काढण्यासाठी सी. डी. बर्फीवाला रोड ते जुहू-वर्सोवा रोड उड्डाणपूल बांधण्याच्या विचारात पालिका प्रशासन आहे. या पुलामुळे वाहतूककोंडी टाळून विनाअडथळा, विनासिग्नल पश्चिम द्रुतगती महामार्गापर्यंत पोहोचता येणे शक्य होणार आहे.
अंधेरी पश्चिम येथील जुहू-वर्सोवा रोड, जुहू जंक्शन परिसरात मोठ्या प्रमाणात वाहतूककोंडी होते. दहा ते पंधरा मिनिटांच्या अंतरासाठी वाहनचालकांना अर्धा ते एक तास लागतो. मेट्रो मार्गामुळे अंधेरीहून घाटकोपर व डी. एन. नगर ते दहिसर जाणे सुसह्य झाले असले तरी रस्तेमार्गे प्रवासासाठी वाहनचालकांची दमछाक होते. यावर पर्याय काढण्यासाठी सी. डी. बर्फीवाला रोड ते जुहू-वर्सोवा रोड उड्डाणपूल बांधण्याच्या विचारात पालिका प्रशासन आहे. या पुलामुळे वाहतूककोंडी टाळून विनाअडथळा, विनासिग्नल पश्चिम द्रुतगती महामार्गापर्यंत पोहोचता येणे शक्य होणार आहे.
सध्या मेट्रो २ प्रकल्पाच्या मार्गिकेच्या कामामुळे या मार्गावर काहीसा अडथळा निर्माण झाला आहे. सी. डी. बर्फीवाला रोड ते जुहू-वर्सोवा रोडपर्यंत असलेल्या रस्त्यालगत उड्डाणपूल बांधण्याचा निर्णय यापूर्वी घेण्यात आला होता. मात्र प्रस्तावित पुलाचे काम व मेट्रो २-बी चे काम हे गुलमोहर रस्त्यापर्यंत असल्याने व जेव्हीपीडी जंक्शनवर मेट्रो स्थानक होणार असल्याने या मार्गावर उड्डाणपूल बांधणे कठीण होते, असे पालिकेने प्रस्तावात स्पष्ट केले आहे.
प्रस्तावित उड्डाणपूल विमानतळ प्राधिकरणाच्या जागेतून घेण्याचा निर्णय घेण्यात आला होता. त्यास प्राधिकरणाने ९ एप्रिल, २०१९ रोजी सहमती दर्शवली होती. गेल्या तीन वर्षांत विमानतळ प्राधिकरणाने आपल्या अखत्यारित येणाऱ्या जागेमध्ये उंचीला मर्यादा असून या ठिकाणची उंची मर्यादा शून्य मीटर इतकी आहे, असे १६ मे २०२३ रोजी दिलेल्या अभिप्राय म्हटले आहे.
प्रकल्पाच्या अभ्यासासाठी तज्ज्ञाची नियुक्ती
या विषयावर अतिरिक्त आयुक्तांच्या दालनात ७ जून २०२३ रोजी झालेल्या बैठकीत हा उड्डाणपूल विमानतळ प्राधिकरणाच्या अखत्यारितील जागेऐवजी मेट्रो मार्गिकेखालून बांधण्यासाठी शक्यतेची पडताळणी करण्याचे सांगितले. त्या अनुषंगाने आयआयटी, मुंबई यांचे तज्ज्ञ प्रा. आर. एस. जार्गीड यांना या कामासाठी नियुक्ती करण्यात आली आहे, अशी माहिती पालिकेकडून देण्यात आली आहे. आयआयटी ही केंद्रीय राष्ट्रीयीकृत संस्था असल्याने तसेच त्यांना अशा कामांचा दीर्घ अनुभव असल्याने सार्वजनिक निविदा मागवून कोणताही उपयोग नाही. त्यामुळे प्रकल्प अभ्यासासाठी संस्थेची नियुक्ती करण्यात आल्याचे प्रशासनाने म्हटले आहे.