म. टा. प्रतिनिधी, फुलंब्री : तालुक्याची खरीप हंगामाची नजर अंदाज पैसेवारी ४६ टक्के आली आहे. त्यामुळे तालुक्यात दुष्काळाची छाया कायम आहे. तालुक्यात यंदा कमी पाऊस पडल्यामुळे शेतकऱ्यांचे खरीपातील उत्पन्न ५० टक्क्यांनी घटले आहे. त्यामुळे सरकारने शेतकऱ्यांना आर्थिक मदत करण्याची गरज निर्माण झाली आहे.
– खरीपातील हंगाम वाया
– खरीपातील हंगाम वाया
फुलंब्री तालुक्यात सुमारे ५७ हजार हेक्टर क्षेत्र खरीप लागवडयोग्य आहे. यंदा सुमारे २५ हजार हेक्टर क्षेत्रात कपाशी पिकाची लागवड करण्यात आली आहे. त्या खालोखाल मका पिक २२ हजार हेक्टर क्षेत्रात आहे. यंदा पावसाने उशिरा हजेरी लावल्यामुळे खरीपातील हंगाम मोठ्या प्रमाणात वाया गेला आहे.
– मका, कपाशीचे नुकसान
मक्याचे सुमारे ६० ते ७० टक्के नुकसान झाले असून, कपाशी पिकाचेही ५० टक्के नुकसान झाले आहे. या वर्षी खरीपात लागवड केलेल्या पिकावर केलेला खर्चही निघणे अवघड झाल्याने शेतकरी पुन्हा आर्थिक संकटात सापडला आहे. कधी ओला दुष्काळ, तर कधी कोरडा दुष्काळाच्या झळा शेतकऱ्यांना सोसाव्या लागत आहे. मागील वर्षी खरीपात काढलेल्या पिक विमा अनेक शेतकऱ्यांना मिळाला नसल्याने पिक विमा कंपनीच्या विरोधात शेतकऱ्यांत नाराजी पसरत आहे. यंदाही तीच परिस्थिती असून, या वर्षी शेतकऱ्यांनी मोठ्या प्रमाणात एक विमा काढला आहे. सरकारने केवळ एक रुपयाचा हप्ता एका पिकासाठी ठेवल्यामुळे शेतकऱ्यांनी पिक विमा काढला. मात्र, या वर्षीदेखील खरीपातील पिके वाया जाण्याची भीती निर्माण झाली आहे.
– सवलतीची मागणी
मक्याचे पीक पूर्णपणे वाया गेले असून, दोन-तीन फुटांवरच मकाच्या पिकाला तुरे लागले आहे. त्यामुळे मक्याच्या पिकाचे मोठ्या प्रमाणात नुकसान झालेले आहे. महसूल विभागाने काढलेली पहिली नजर अंदाज पैसेवारी ४६ टक्के आली आहे. ‘पिक विम्याच्या माध्यमातून सरसकट शेतकऱ्यांना आर्थिक मदत करण्यात यावी; तसेच दुष्काळाच्या सवलती तालुक्यातील शेतकऱ्यांना लागू करण्यात याव्यात,’ अशी मागणी शेतकऱ्यांतून होऊ लागली आहे.
दुष्काळाची छाया अन् शेतकरी
फुलंब्री तालुक्यात शेतकरी दुष्काळाच्या छायेत अडकला असून, कधी ओला दुष्काळ तर कधी कोरडा दुष्काळ शेतकऱ्यांच्या पाठीशी सतत घोंगावत आहे. मागील वर्षी अतिवृष्टीत खरीपातील संपूर्ण पीक वाया गेले होते. त्यामुळे सरकारने हेक्टरनिहाय केवळ सहा हजार रुपयांची आर्थिक मदत जाहीर केली. ही मदत अद्यापही अनेक शेतकऱ्यांच्या खात्यावर पोहोचली नाही. या मदतीसाठी शेतकरी तहसील कार्यालयाच्या चकरा मारू लागले आहेत. दुसरीकडे, या वर्षीदेखील पुन्हा खरीपातील पिके पावसाअभावी वाळल्याने कोरडा दुष्काळ जाहीर करण्याची मागणी शेतकऱ्यांतून होऊ लागली आहे.
मागील वर्षी दुष्काळात संपूर्ण खरीपातील पीक अतिवृष्टीत वाया गेले. या वर्षी पावसाने मोठा कालावधी दर्शन न दिल्याने खरीपातील पीक वाळून गेले. शेतकरी दर वर्षी मोठ्या आर्थिक संकटात सापडू लागला आहे. सरकारने शेतकऱ्यांना पिक विमासह दुष्काळाच्या सवलती लागू कराव्यात.- साईनाथ बेडके, तालुकाध्यक्ष, शेतकरी संघटना, फुलंब्री
ज्या ठिकाणी पाणी टंचाई जाणवत आहे, अशा ठिकाणी विहीर अधिग्रहण करणे, अथवा टँकर पुरविणे, तलावातील पाणी उपसा बंद करण्यात येईल. विमा कंपनींच्या प्रतिनिधींशी बैठक घेण्यात आली असून, सरकरी नियमांनुसार योग्य कार्यवाही सुरू आहे.- डॉ. कृष्णा कानघुले, तहसीलदार, फुलंब्री
मंडळनिहाय नजर अंदाज पैसेवारी (टक्क्यांमध्ये)
वडोद बाजार ४७
आळंद ४७
बाबरा ४७
फुलंब्री ४६
पीरबावडा ४५
एकूण सरासरी ४६