घराचं दार उघडताच मृत्यू आत शिरला

महेशनगर भागात पाणी साचले असतानाच एका महिलेने घराचा दरवाजा उघडला. त्यामुळे पाण्याचा लोट घरात आला व एकट्याच राहणाऱ्या मीराबाई कप्पूस्वामी पिल्ले (७०) यांचा तोल गेला. घरात साचलेल्या पाण्यातच पडल्याने नाका-तोंडात पाणी जाऊन त्यांचा मृत्यू ओढवला. अशीच दुर्घटना महेशनगर परिसरातील एका घरात ओढवली. संध्या श्यामराव ढोरे (५०) यांचाही पुराचे पाणी घरात शिरल्याने मृत्यू झाला. संध्या व त्यांच्या आई सयाबाई ढोरे (७२) या एका खोलीत राहायच्या. नातेवाईकांनी संध्या यांना पलंगावर ठेवले. मात्र, पाण्याची पातळी वाढल्याने त्यांचा बुडून मृत्यू झाला.

Nagpur Rain: हवामान खात्याकडून मोठी चूक, रडार असूनही अचूक इशारा नाही अन् नागपूरकरांचे हाल
शिंदे, फडणवीस यांच्याकडून आढावा

मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी नागपुरातील या स्थितीचा आढावा घेतला. मुख्यमंत्र्यांनी फडणवीस यांच्यासह जिल्हाधिकाऱ्यांशी दूरध्वनीवरून चर्चा केली. अतिवृष्टीग्रस्त भागातील नागरिकांना आवश्यक त्या सर्व सुविधा पुरविण्याचे निर्देश त्यांनी दिले. उपमुख्यमंत्री फडणवीस यांनीही प्रशासनाला आवश्यक त्या खबरदारी घेण्याच्या सूचना दिल्या.

दशकभरातील दुसरा सर्वाधिक पाऊस

नागपुरात १०८.३ मिमी नोंदवला गेलेला हा पाऊस सप्टेंबर महिन्यात पडलेला गेल्या दशकभरातील सर्वाधिक पाऊस होता. याआधी, मागील वर्षी १३ सप्टेंबर रोजी १२७ मिमी पावसाची नोंद झाली होती. हवामान खात्याने पुढील २४ तासांत जोरदार पावसाचा अंदाज व्यक्त केला आहे. रविवार ते मंगळवार दरम्यान बहुतांश नागपूर जिल्ह्यात जोरदार पाऊस होईल, असा अंदाज आहे.