या पावसामुळे निर्माण झालेली परिस्थितीसाठी जिल्हा प्रशासनाला आपत्ती प्रतिसाद दलांचा वापर करावा लागला. पुरात फसलेल्या नागरिकांना बाहेर काढावे लागले. मात्र, इतका प्रचंड पाऊस पडेल असा कोणताही इशारा जिल्हा प्रशासनालाही हवामानखात्याने कळविला नव्हता. त्यामुळे, अद्ययावत डॉपलर रडार यंत्रणा असतानाही तिचा योग्य उपयोग न झाल्याने त्याचा फटका शहराला बसल्याचे स्पष्ट झाले आहे.

अंदाजतज्ज्ञांचे काम नऊ वाजता संपते!

डॉपलर यंत्रणा असली तरी तिच्या निरीक्षणांचा उपयोग करून अंदाज वर्तवू शकणारे तज्ज्ञच रात्री उपलब्ध नसतात, अशी माहिती पुढे आली आहे. त्यामुळे, पुढेही शनिवारसारखी परिस्थिती उद्भवल्यास रात्रीच्या वेळी अंदाज वर्तविला जाईल किंवा नाही याविषयी साशंकता निर्माण झाली आहे.

‘प्रादेशिक हवामान केंद्राचे रडार व्यवस्थित कार्यरत आहे. मात्र, त्यावरून विजांचा किंवा किती पाऊस येईल, याचा नेमका अंदाज येत नसतो. त्यासाठी अंदाजाची गणिते बांधावी लागतात. रात्री नऊनंतर अंदाज वर्तविणाऱ्या तज्ज्ञांची काम संपते. तरीसुद्धा आमची चमू घरून काम करीत होती. रात्रपाळीला निरीक्षण विभागातील कर्मचारी कार्यरत असतात. त्यांना असा अंदाज वर्तविता येणे शक्य नाही’, अशी प्रतिक्रिया नागपूर प्रादेशिक हवामान केंद्राचे महासंचालक एम. एल. साहू यांनी ‘मटा’शी बोलताना दिली. शुक्रवारी मध्यरात्रीनंतर अतिवृष्टीचा अंदाज वर्तविण्यात आला होता. त्यानुसार १२० मिमीच्या आसपास पाऊस होणे अपेक्षित होते आणि ११६.४ मिमी पावसाची नोंद करण्यात आली. त्यामुळे पावसाचा अंदाज तसा अचूक ठरला. तसेच विजांसह पावसाची हजेरी लागेल हाही अंदाज अचूक ठरला. मात्र, विजांचा कडकडाट तुलनेने अधिक होता, हे खरे आहे. शहरात यापूर्वी यापेक्षाही अधिक पाऊस झाला आहे. परंतु, रात्री २ ते ४ या काळात ९० मिमी पाऊस झाल्याने काही पूरग्रस्त स्थिती निर्माण झाली, असेही साहू म्हणाले.