कोल्हापूर : कोल्हापूरची अर्थवाहिनी समजला जाणारा कोल्हापूर जिल्हा दूध उत्पादक संघ अर्थात गोकुळची ६१ वी वार्षिक सर्वसाधारण सभा ही नेहमीप्रमाणे वादळी ठरली. सत्ताधारी सतेज पाटील आणि हसन मुश्रीफ गट विरुद्ध महाडिक गट असा वाद रंगलेला पाहायला मिळाला. कोल्हापुरातील पंचतारांकित MIDC येथील महालक्ष्मी पशुखाद्य कारखान्याच्या मैदानात ही सर्वसाधारण सभा पार पडली. या सभेकडे संपूर्ण जिल्ह्याचे लक्ष लागून राहिले होते. यावेळी महाडिक गटाकडून लढणाऱ्या गोकुळच्या संचालिका शौमिका महाडिक यांनी आक्रमक पवित्रा घेतला. या सभेत सत्ताधारी गटाविरुद्ध शौमिका महाडिक या सुरुवातीपासूनच आक्रमकरित्या लढताना दिसत होत्या. त्यामुळे शौमिका महाडिक जिल्ह्याच्या राजकीय वर्तुळात चर्चेत आल्या आहेत.
कोण आहेत शौमिका महाडिक ?
– शौमिका महाडिक या मूळच्या राजश्री शाहू महाराजांचे जनक घराणे म्हणजे घाटगे कुटुंबातील आहेत.
– भाजपचे माजी आमदार अमल महाडिक यांच्या त्या पत्नी आहेत.
– माजी आमदार महादेवराव महाडिक हे त्यांचे सासरे तर भाजपचे राज्यसभा खासदार धनंजय महाडिक हे त्यांचे दीर आहेत.
– शौमिका महाडिक यांनी कोल्हापूर जिल्हा परिषदेचं अध्यक्षपद भूषवलं आहे.
– महाडिक कुटुंब भाजपमध्ये गेल्यापासून पक्षाने शौमिका महाडिक यांना आधी भाजपच्या जिल्हाध्यक्ष आणि आता महिला प्रदेश उपाध्यक्षपदाची जबाबदारी दिली आहे.
– २०२१ ला झालेल्या जिल्हा दूध उत्पादक संघ गोकुळच्या निवडणुकीत शौमिका महाडिक यांनी पाटील-मुश्रीफ गटाच्या अंजना केदारी रेडेकर यांना ४३ मतांनी मागे टाकत संचालकपदी निवडणूक आल्या.
शौमिका महाडिक यांनी गेल्या वर्षभरात वेळोवेळी सत्ताधाऱ्यांच्या कामावर अनेक प्रश्न उपस्थित केले आहेत. या संदर्भात त्यांनी अनेक वेळा पत्रकार परिषद घेतल्या. या सर्वांमध्ये सत्ताधाऱ्यांकडून आपल्याला उत्तर मिळत नसल्याचेही त्या म्हणाल्या. अशातच आता गोकुळची ६१ वी सर्वसाधारण सभा जाहीर झाली आणि शौमिका महाडिक यांनी संपर्क सभा सुरू केली. यामाध्यमातून त्यांनी त्यांच्या प्रत्येक सभासदापर्यंत पोहोचत त्यांच्या अडचणी जाणून घेण्याचा प्रयत्न केला. यानंतर त्यांनी सभेच्या पूर्वसंध्येला पत्रकार परिषद घेत सत्ताधाऱ्यांवर जोरदार टीका करत सत्ताधाऱ्यांचं काम असंच जर सुरू राहिलं तर गोकुळचा शेतकरी संघ व्हायला वेळ लागणार नाही, असा हल्लाबोल केला. तसंच सर्वसाधारण सभेवेळीही सत्ताधारी गटावर सडकून टीका केली.