म. टा. विशेष प्रतिनिधी, मुंबई/नाशिक : केंद्रीय कृषी मंत्रालयाकडून कृषि उद्योग प्रक्रियेसाठी राज्याचे आदिवासी विकासमंत्री डॉ. विजयकुमार गावित यांच्या कन्या व नंदुरबार जिल्हा परिषदेच्या विद्यमान अध्यक्षा सुप्रिया गावित यांच्या संस्थेला दहा कोटींचे अनुदान मंजूर झाल्याने नव्या वादाला तोंड फुटले आहे. काँग्रेसने यावरून थेट पंतप्रधान नरेंद्र मोदींवरच हल्लाबोल केला आहे. ही ‘भाजप परिवार वाचवा योजना’ असल्याचा आरोप काँग्रेस नेते सचिन सावंत व नाना पटोले यांनी केला आहे. कन्या सुप्रिया गावित यांची संस्था केंद्राच्या निकषात बसल्यानेच अनुदान मंजूर झाल्याचा खुलासा मंत्री गावित यांनी केला आहे.
हा परिवाद नव्हे का?
भाजपवर निशाणा साधताना सचिन सावंत म्हणाले, ‘कुंपणानेच शेत खाण्याचा हा प्रकार आहे. केंद्रीय अन्नप्रक्रिया मंत्रालयाने एपीसी योजनेअंतर्गत कृषिप्रक्रिया क्लस्टर प्रकल्पांना मान्यता दिली आणि यात लाभार्थी आहेत, आदिवासी विकासमंत्री डॉ. विजय कुमार गावित यांच्या कन्या सुप्रिया गावित यांची रेवा तापी औद्योगिक विकास कंपनी. पंतप्रधान स्वतःला ‘प्रधानसेवक’ म्हणवतात आणि त्यांच्या पक्षाचे लोक ‘शेख अपनी देख’ तत्त्वज्ञानावर विश्वास ठेवत प्रथम स्वयंसेवेत रमतात. सरकारने जनतेसाठी काम करायचे असते, भाजपचे मंत्री आणि त्यांच्या मुलांसाठी नाही. हा भाजपाचा परिवारवाद नव्हे काय?’
निकषानुसारच अनुदान मंजूर : डॉ. गावित
केंद्र सरकारची ही योजना असून, कृषी उद्योगासाठीचे आवश्यक ते निकष सुप्रिया गावित यांच्या संस्थेने पूर्ण केले आहेत. त्यामुळे नियमानुसारच रेवा तापी औद्योगिक विकास संस्थेला १० कोटींचे अनुदान केंद्राने मंजूर केल्याचा खुलासा डॉ. विजयकुमार गावित यांनी केला आहे. केंद्र सरकारच्या पोर्टलवर यासाठी अर्ज मागविण्यात आले. त्यानुसार रेवा संस्थेने ऑनलाइन अर्ज दाखल करीत अनुदान मिळवले आहे. केंद्राचे ५० टक्के अनुदान, तर संस्थेचे ५० टक्के भांडवल असून, त्यासंदर्भातील सर्व प्रक्रिया संस्थेने पूर्ण केल्यानेच हे अनुदान मिळाले आहे. त्यामुळे काँग्रेसचे नेते सचिन सावंत यांनी केलेले आरोप खोटे आहेत, असा खुलासा गावित यांनी केला आहे.