म. टा. विशेष प्रतिनिधी, नाशिक: दोन दिवसांच्या मुसळधार पावसानंतर बदलत्या वातावरणाचा विपरित परिणाम शहरवासीयांच्या आरोग्यावर झाला असून, शहर तापाने फणफणल्याची स्थिती निर्माण झाली आहे. तापसदृश आजाराच्या साथीने शहरात धुमाकूळ घातला असून, महापालिकेच्या रुग्णालयांमध्ये दहा दिवसांत तापसदृश व्हायरल आजाराच्या दोन हजारांवर रुग्णांची नोंद झाली आहे. पण, खासगी रुग्णालयांमध्ये व्हायरल तापाच्या रुग्णांची मात्र रांगच लागत असल्याचे चित्र आहे. डेंग्यूचा ‘ताप’ही कायम असून, सप्टेंबरच्या पहिल्या दहा दिवसांतच डेंग्यूच्या रुग्णसंख्येने पन्नासचा आकडा गाठल्याने आरोग्य यंत्रणेसमोर आव्हान निर्माण झाले आहे. यंदा पाऊस कमी असतानाही डेंग्यू, मलेरियासारख्या कीटकजन्य आजारांचा प्रादुर्भाव शहरात वाढू लागला आहे.
पालिका मूकदर्शकाच्या भूमिकेत
शहरातील खासगी रुग्णालये आणि क्लिनिक तापाच्या रुग्णांनी ‘फुल्ल’ असताना महापालिका प्रशासन मात्र मूकदर्शकाच्या भूमिकेत आहे. शहरात डासांचा प्रादुर्भाव वाढूनही धूरफवारणी कागदावरच आहे. रहिवासी भागात धूरफवारणी गरजेची असताना महापालिकेची यंत्रणा मात्र शासकीय कार्यालयांमध्ये डेंग्यूच्या अळ्या शोधण्यात व्यस्त आहे. महापालिकेकडून आता तातडीने उपाययोजनांची मागणी होत आहे.
जमिनीखालून रडण्याचा आवाज, एक पाय दिसला अन् सारेच हादरले, खोदून पाहिलं तर…
डेंग्यूचा धुमाकूळ सुरूच
यंदा पावसाचे प्रमाण कमी असतानाही डेंग्यूबाधित रुग्णांचा एकूण आकडा तीनशेपार पोहोचल्याने शहरातील धूर फवारणी कागदावरच होत असल्याचे चित्र आहे. जूनपर्यंत शहरात ११६ डेंग्यूबाधित होते. जुलैत पाऊस कमी असतानाही २८ रुग्णांची भर पडली. ऑगस्टमध्ये ११७ रुग्णांची नोंद झाली, तर सप्टेंबरच्या पहिल्या आठवड्यातच ३६ डेंग्यूबाधितांची नोंद झाली. त्यामुळे आरोग्य विभाग ‘अॅलर्ट मोड’वर आला आहे.
बदलत्या वातावरणामुळे तापसदृश आजाराचे रुग्ण आढळत आहेत. नागरिकांनी घाबरून जाण्याचे कारण नाही. आरोग्याची काळजी घ्यावी. डॉक्टरांचा सल्ला घेऊन औषधे घ्यावीत -डॉ. नितीन रावते, वैद्यकीय अधिकारी, महापालिका