म. टा. विशेष प्रतिनिधी, नाशिक : देशभरातील स्वच्छ शहरांच्या यादीत अव्वल क्रमांक मिळविण्यासाठी मनपा प्रशासन प्रयत्न करीत असताना खासदार, आमदारांसह भावी नेत्यांच्या वाढदिवसाच्या अनधिकृत होर्डिंग्ज आणि फलकांमुळे शहर बकाल बनले आहे. स्वच्छ सर्वेक्षणाची प्रक्रिया सुरू असताना नेत्यासंह इच्छुकांच्या ‘भाऊ’गर्दीचे गल्लोगल्ली लागले बॅनर आणि होर्डिंग्जमुळे पालिकेचे यंदाही मिशन स्वच्छतेचे स्वप्न भंगणार आहे. सर्वसामान्यांच्या अतिक्रमणावर बडगा उगारणारा अतिक्रमण विभाग या इच्छुकांना मात्र शरण गेला आहे.
राज्यात महाविकास आघाडीपाठोपाठ महायुतीच्या प्रयोगामुळे राजकारणात मोठी उलथापालथ सुरू आहे. दोन नव्या राजकीय पक्षांचा उदय झाल्यामुळे निवडणुकांसाठी इच्छुकांचीही संख्या वाढत चालली आहे. आगामी लोकसभा, विधानसभा निवडणुकांसह स्थानिक स्वराज्य संस्थांच्या येऊ घातलेल्या निवडणुकांमुळे राजकीय वातावरण तापण्यास सुरुवात झाली आहे. त्याचबरोबर या निवडणुकांमध्ये इच्छुकांची लगीनघाई सुरू झाली आहे. पोस्टर, बॅनरद्वारे ‘चमकोगिरी’ करण्याची जणू स्पर्धाच या ‘पोस्टर बॉइज’मध्ये सुरू झाली आहे. फलक, बॅनर उभारण्यासाठी महापालिकेची सशुल्क परवानगी घेणे बंधनकारक असतानाही या इच्छुक पोस्टर बॉइजसह भाई, नेत्यांनी अनधिकृतरित्या फलक, बॅनर उभारून महापालिकेचे शुल्क बुडविले तर जात आहेच, पण शहराला बकाल करत आहेत.
राज्यात महाविकास आघाडीपाठोपाठ महायुतीच्या प्रयोगामुळे राजकारणात मोठी उलथापालथ सुरू आहे. दोन नव्या राजकीय पक्षांचा उदय झाल्यामुळे निवडणुकांसाठी इच्छुकांचीही संख्या वाढत चालली आहे. आगामी लोकसभा, विधानसभा निवडणुकांसह स्थानिक स्वराज्य संस्थांच्या येऊ घातलेल्या निवडणुकांमुळे राजकीय वातावरण तापण्यास सुरुवात झाली आहे. त्याचबरोबर या निवडणुकांमध्ये इच्छुकांची लगीनघाई सुरू झाली आहे. पोस्टर, बॅनरद्वारे ‘चमकोगिरी’ करण्याची जणू स्पर्धाच या ‘पोस्टर बॉइज’मध्ये सुरू झाली आहे. फलक, बॅनर उभारण्यासाठी महापालिकेची सशुल्क परवानगी घेणे बंधनकारक असतानाही या इच्छुक पोस्टर बॉइजसह भाई, नेत्यांनी अनधिकृतरित्या फलक, बॅनर उभारून महापालिकेचे शुल्क बुडविले तर जात आहेच, पण शहराला बकाल करत आहेत.
विभागीय अधिकाऱ्यांचेही दुर्लक्ष
शहरातील कोणत्याही भागात अनधिकृत होर्डिंग्ज, बॅनर, पोस्टर, झेंडे लावले जाणार नाही याबाबत खबरदारी घेण्याचे निर्देश विभागीय अधिकाऱ्यांना दिले आहेत. विभागीय अधिकाऱ्यांनी आपापल्या कार्यक्षेत्रात फिरून अनधिकृत, विनापरवाना होर्डिंग्ज, बॅनर, पोस्टर, आढळून आल्यास संबंधितांवर गुन्हे दाखल करण्याची कारवाई करावी, अशा सूचना यापूर्वीच आयुक्तांनी दिल्या आहेत. परंतु, मनुष्यबळाचे कारण देत विभागीय अधिकाऱ्यांकडूनही आयुक्तांच्या आदेशाला केराची टोपली दाखवली जात आहे.
न्यायालयाच्या आदेशाला केराची टोपली
अनधिकृत होर्डिंग, पोस्टर्स लावणाऱ्यांवर थेट गुन्हे दाखल करण्याचे न्यायालयाचे निर्देश आहेत. दुसरीकडे गल्लीतील ‘भजीपाव दादा’ ते दिल्लीतील बड्या नेत्यांच्या स्वागत, वाढदिवसाची अनधिकृत फलके ‘स्वच्छ नाशिक, सुंदर नाशिक’ची वाटचाल अडचणीत आणणारे ठरले आहेत. या अनधिकृत फलकांवर कारवाई होत नसल्यामुळे नागरिकांकडून नाराजी व्यक्त होत आहे. त्यातच रस्त्यावरील विक्रेत्यांची अतिक्रमणे, अनधिकृत बांधकामे महापालिकेच्या अतिक्रमण विभागाच्या अस्तित्वावरच प्रश्नचिन्ह निर्माण करणारे ठरले आहेत.