मराठवाड्यात एकूण ८७७ प्रकल्पात फक्त ३५.६९ टक्के पाणीसाठा शिल्लक आहे, अशी माहिती जलसंपदा विभागाने दिली आहे. जायकवाडी धरणात ३४ टक्के पाणी आहे. येलदरी ६०, सिद्धेश्वर ४४, माजलगाव १४, मांजरा २६, उर्ध्व पेनगंगा ६४, निम्न तेरणा २८, निम्न मनार ५१, विष्णुपुरी ८१, निम्न दुधना २७ आणि सिना कोळेगाव शून्य टक्के अशी धरणनिहाय पाण्याची टक्केवारी आहे.

दरम्यान, छत्रपती संभाजीनगर जिल्ह्यातील ९७ पैकी ४५ लघु प्रकल्प कोरडे आहेत. जालना जिल्ह्यातील ५७ पैकी ५०, बीड जिल्ह्यातील १२६ पैकी ८७, धाराशीव जिल्ह्यातील २०६ लघु प्रकल्पांपैकी १०९ प्रकल्प कोरडे आहेत. या भागात पुरेसा पाऊस न झाल्यास तीव्र पाणी टंचाई निर्माण होण्याची शक्यता आहे. छत्रपती संभाजीनगर, हिंगोली आणि नांदेड जिल्ह्यात मागील महिन्यात २८ टँकर सुरू होते. थोडा पाऊस झाल्यानंतर टँकर बंद करण्यात आले होते. आता पुन्हा छत्रपती संभाजीनगर आणि जालना जिल्ह्यात प्रशासनाने ८३ टँकर सुरू केले आहेत.
सरासरी पावसाचा विषम वर्षाव; पिकं करपत असल्याने शेतकऱ्यांची धाकधूक वाढली, या जिल्ह्यांनी चिंता वाढवली
सात मध्यम प्रकल्प कोरडे

छत्रपती संभाजीनगर जिल्ह्यात पावसाने ओढ दिली असल्याने धरणात पाणीसाठा नाही. जिल्ह्यात १६ मध्यम प्रकल्प असून सात प्रकल्प पूर्ण कोरडे आहेत. इतर धरणातही जेमतेम पाणीसाठा शिल्लक आहे.

सुखना १२ टक्के, टेंभापुरी ३५, ढेकू २०, नारंगी १९, नारंगी १९, वाकोद २५, गिरजा २९, अंजना पळशी २८, शिवना टाकळी २१ आणि अजिंठा अंधारी प्रकल्पात १८ टक्के पाणीसाठा आहे. लाहुकी, कोल्ही, बोरदहेगाव, अंबाडी, गडदगड, पूर्णा नेवपूर, खेळणा प्रकल्प पूर्ण कोरडे आहेत.