गॅसचा टँकर पलटल्याने महामार्गावर वाहतूक सुरक्षेचा उपाय म्हणून तात्काळ थांबवण्यात आली आहे. तसेच हा टँकर रस्त्याच्या मधोमध आडवा झाल्याने वाहतुकीला मोठा अडथळा निर्माण झाला आहे. घटनास्थळी जेसीबी बोलवण्यात आला आहे. सुदैवाने या अपघातात कोणतीही जीवितहानी झालेली नाही.
मुंबई गोवा राष्ट्रीय महामार्गावर निवळी घाट उतरत असलेला गॅस वाहू टँकर महामार्गावर मधोमध आडवा झाल्याने मुंबई गोवा राष्ट्रीय महामार्गावरील वाहतूक पूर्णपणे बंद पडली आहे. महामार्गावर दोन्ही बाजूने वाहनांच्या रांगा लागल्या आहेत. अपघातग्रस्त टँकरमधून गॅस गळती होत नसल्यानं धोका टळलेला आहे. घटनास्थळी पोलीस प्रशासन लक्ष ठेवून आहे.
एकेरी वाहतूक सुरु पण महामार्गावर रांगा
रत्नागिरीच्या निवळी घाटात एलपीजी टँकर पलटी झाल्यानं वाहतूक बंद झाली आहे. प्रशासनानं घटनास्थळी एकेरी वाहतूक सुरु केली आहे. पोलिसांसह एमआयडीसीचे अधिकारी, अग्निशमन दलाचं पथक आणि एलपीजी वाहतुकीसंदर्भातील तज्ज्ञांची टीम देखील घटनास्थळी दाखल झाली आहे. दरम्यान, पोलिसांकडून एकेरी वाहतूक सुरु करण्यात आली आहे. पण, टँकर हटवताना पुन्हा वाहतूक थांबवली जाण्याची शक्यता आहे.
मुंबई गोवा महामार्गावरील निवळी घाटात एलपीजीचा टँकर पलटी झाला आहे. त्यामुळं वाहतूक ठप्प झाली आहे. काही दिवसांपूर्वी देखील मुंबई गोवा महामार्ग कोकणातील नद्यांच्या पाणी पातळीत वाढ झाल्यानं सतर्कतेसाठी वाहतूक बंद ठेवण्यात आली होती. दोन ठिकाणी वाहतूक बंद करण्यात आली होती.