दयानंद महाविद्यालयात वाणिज्य विभागात गुरुवारी सकाळी काही वर्ग सुरू होते. तर काही वर्गात परीक्षा सुरू होती. हळूच बेलजवळ जाऊन 5 इडियट्सनी कुरापत करत तास संपल्यासारखी बेल वाजवून धूम ठोकली होती. बेल वाजवताना काही शिक्षकांनी त्या 5 इडियट्सना पाहिले होते. बेल कुणी वाजवली? याबाबत प्राचार्य गणेश शिंदेंनी ताबडतोब चौकशी सुरू केली होती. साक्षीदार शिक्षकांनी बेल वाजवून पळणाऱ्या विद्यार्थ्यांना बोलावून घेतले आणि चौकशी केली. प्राचार्यांसमोर 5 इडियट्सनी बेल वाजवल्याची कबुलीही दिली.

कारवाई होताच विद्यार्थी आणि पालकांची कुलगुरूंकडे धाव

महाविद्यालयात विनाकारण बेल वाजवून पळणाऱ्या पाचही विद्यार्थ्यांवर प्रवेश रद्दची कारवाई होणार होती. यामुळे विद्यार्थी आणि पालकांनी काँग्रेसचे नेते मनोज कुलकर्णी यांच्याशी संपर्क साधला आणि घटना सांगितली. मनोज कुलकर्णी यांच्या मार्फत पुण्यश्लोक अहिल्यादेवी होळकर सोलापूर विद्यापीठाचे कुलगुरू डॉ. रजनीश कामत यांच्याशी संपर्क साधला. कारवाई करू नका अशी विनंती त्यांनी केली. विद्यार्थ्यांचे शैक्षणिक नुकसान होऊ नये यासाठी प्राचार्यांशी चर्चा करून विद्यार्थ्यांना समज द्या, अशी चूक किंवा घटना पुन्हा होऊ नये यासाठी समज द्या अशा सूचना कुलगुरूंनी दिल्या. यानंतर दयानंद महाविद्यालयाचे प्राचार्य गणेश शिंदेंनी कारवाई मागे घेत विद्यार्थ्यांना समज देत प्रवेश रद्दची कारवाई मागे घेतली.