दुसरीकडे, वणवण भटकून मशरूम गोळा करणाऱ्या खेड्यापाड्यातील लोकांना शहरात मशरूमला चांगले भाव मिळत आहे हे विशेष. पावसाची हजेरी लागताच गडचिरोली जिल्ह्यातील विविध बाजारपेठेत जंगली मशरूम विक्रीसाठी आले आहे. सध्या या जंगली मशरूमला बाजारपेठेत मोठी मागणी असल्याचे दिसत आहे. सोबतच चांगला दर देखील मिळत असून ८०० ते १००० रुपये प्रति किलोला दर मिळत आहे. सध्या बाजारात मशरूमची खरेदी करण्यासाठी मशरूम खवय्ये गर्दी करत आहेत. नैसर्गिक वन संपदेने नटलेल्या गडचिरोली जिल्ह्यात मोठ्या प्रमाणात जंगले आहेत. या जिल्ह्यात विजेच्या कडकडाटासह पावसाची हजेरी लागताच जंगलीव्याप्त भागात नैसर्गिक पद्धतीनं हे मशरूम स्वतः उगवते. याची कुठेही लागवड केली जात नाही.

नैसर्गिकरित्या मोठ्या प्रमाणावर जंगलात हे मशरूम उगवते. गावकरी सकाळी जंगलात जाऊन मशरूम खोदून आणतात. त्यानंतर मशरूम स्वच्छ पाण्याने धुवून त्याला विक्रीसाठी बाजारात घेऊन जातात. मशरूम हे आरोग्याला पोषक असल्याने डॉक्टर देखील पावसाळ्यात जंगली मशरूम खाण्याचा सल्ला देतात अशी माहिती विक्रेत्यांनी दिली आहे. गडचिरोली जिल्ह्यातील कोरची, धानोरा, एटापल्ली, मुलचेरा,अहेरी, भामरागड, सिरोंचा तालुक्यातील जंगलात हे मशरूम पाहायला मिळते. विशेषत: बांबू जंगलात याचे उत्पादन जास्त प्रमाणात होते. पावसाळा सुरू झाला की, मशरूम मोठ्या प्रमाणात उगवते. तसेच बाजारपेठेत देखील त्याला या काळात जास्त मागणी असते. श्रावण महिन्यात नागरिक मांसाहारी पदार्थ टाळतात. त्यामुळे या काळात मशरूमला मोठी मागणी असते. शरीरासाठी देखील मशरूम पोषक असते. आयुर्वेदात देखील मशरुमचे मोठे महत्व आहे. त्यामुळेच बाजारात मशरूमला मोठी मागणी आहे.