मुंबईतील सायन विधानसभा क्षेत्रातील शिवसैनिकांनी शनिवारी मातोश्रीवर उद्धव ठाकरे यांची भेट घेतली. ठाकरे गटाचे विभागप्रमुख प्रमोद शेंडे यांच्या नेतृत्वात सायन कोळीवाडा येथील शिवसैनिक उद्धव ठाकरे यांना भेटायला आले. यावेळी उद्धव ठाकरे यांनी या कार्यकर्त्यांशी संवाद साधला. यावेळी उद्धव ठाकरे यांनी जोरदार राजकीय फटकेबाजी करत या शिवसैनिकांमध्ये नवचैतन्य फुंकण्याचा प्रयत्न केला.

आम्ही इर्शाळवाडीला चिखल तुडवत गेलो, काहीजण व्हॅनिटी व्हॅनने गेले; मुख्यमंत्री शिंदेंचा उद्धव ठाकरेंना टोला

यावेळी उद्धव ठाकरे यांनी नुकत्याच दिल्लीत झालेल्या भाजपप्रणित राष्ट्रीय लोकशाही आघाडीच्या (NDA) बैठकीसंदर्भात खोचक टिप्पणी केली. आता पाच वर्षानंतर NDA नावाचा अमिबा जिवंत आहे, हे कळाले, असे त्यांनी म्हटले. मी लवकरच तुम्हाला मुंबई आणि राज्यभरात कार्यक्रम देणार आहे, तो नीट पार पाडा, असे उद्धव यांनी शिवसैनिकांना सांगितले. कोणी गेल्यानंतर आपल्या सागराला उधाण येते, त्वेष, राग आणि जिंकण्याची इर्षा आणखी वाढते. जे गेलेत त्यांना जय महाराष्ट्र. आता त्यांचा आणि आपला संबंध तुटला. मला फक्त एवढीच अपेक्षा आहे की, त्यांनी तिकडे जाऊन पक्षाशी गद्दारी करु नये. त्यांनी पक्षविरोधी काम केल्यास आपल्याला शिवसैनिक काय असतो, हे त्यांना दाखवून द्यावं लागेल. आपले बालेकिल्ले शाबूत राखण्यसाठी तुम्ही समर्थ आहात. भाजप आणि शिंदे गटाच्या प्रत्येक कार्यक्रमात माझ्यावर टीका केली जाते. इतके प्रयत्न करुनही शिवसेना अजून संपत का नाही, हा प्रश्न त्यांना पडला आहे. एकदा निवडणुका होऊनच जाऊ दे. सरकारने निवडणुका घ्याव्यात, असे आव्हान उद्धव ठाकरे यांनी दिले.मला एका गोष्टीचा अभिमान आहे. २००७ च्या मुंबई महानगरपालिकेच्या निवडणुकीवेळीही असेच वातावरण तयार झाले होते. आता शिवसेनेचं काय होणार , मुंबई महानगरपालिकेवरीच सत्ता जाणार, अशी चर्चा तेव्हा होती. पण शिवसैनिकांच्या मेहनतीमुळे आपण विजय मिळवला. आतादेखील शिवसेना दिवसागणिक जोमाने वाढत आहे, असेही उद्धव ठाकरे यांनी म्हटले.