आमदार राजेंद्र राऊतांसमोर भाऊसाहेब आंधळकरांचे आव्हान
बार्शीचे विद्यमान आमदार राजेंद्र राऊत हे देवेंद्र फडणवीसांच्या अगदी जवळचे आणि मर्जीतील आमदार म्हणून ओळखले जातात.देवेंद्र फडणवीस व मुख्यमंत्री एकनाथ शिंदे यांची सरकार स्थापन होण्याअगोदर बार्शीचे आमदार राजेंद्र राऊत यांनी बार्शीतील प्रसिद्ध अशा भगवंत मंदिरात जाऊन साकडं घातले होते.आमदार राजेंद्र राऊत आणि देवेंद्र फडणवीसांचे कौटुंबिक संबंध आहेत.
बार्शी तालुक्यातील एकनाथ शिंदे गटाचे शिवसेना तालुकाप्रमुख आणि माजी पोलीस अधिकारी भाऊसाहेब आंधळकर यांनी राजेंद्र राऊतांविरोधात आव्हान उभे केले आहे. भाऊसाहेब आंधळकर आणि राजा राऊत यांच्या मधून विस्तव देखील जात नाही.मात्र, आगामी विधानसभा निवडणुकीत भाजप नेते आणि शिंदे गट शिवसेनेचे नेते एकमेकांना सोबत घेत निवडणूका लढणार की एकमेकांविरोधात उभे ठाकणार हे पाहण्यासारखे आहे.
बार्शीतील गुन्हेगारी मोडीत काढणार : भाऊसाहेब आंधळकर
शिवसेनेचे तालुका अध्यक्ष भाऊसाहेब आंधळकर पोलीस सेवेत अधिकारी पदावरून निवृत्त झाले आहेत.निवृत्तीनंतर त्यांनी बार्शीत शिवसेनेमधून समाजकारण सुरू केले.महाविकास आघाडीची सत्ता जाऊन देवेंद्र फडणवीस आणि एकनाथ शिंदे यांचं सरकार स्थापन झाल्यानंतर भाऊसाहेब आंधळकर यांनी एकनाथ शिंदेच्या शिवसेनेत प्रवेश केला.आगामी विधानसभा निवडणुकीत शिवसेनेकडून निवडणूक लढणार असल्याची माहिती त्यांनी दिली.बार्शीमध्ये गुन्हेगारी मोठी वाढली आहे,अनेक नवयुवकांवर गुन्हे दाखल होतं आहेत. बार्शी मधील काही राजकिय नेते या तरुणांचा दुरुपयोग करत आहेत,ही गुन्हेगारी मोडीत काढणार असल्याची माहिती भाऊसाहेब आंधळकर यांनी बोलताना दिली.