मंत्रिमंडळ विस्ताराची चाहुल लागल्यापासूनच भरत गोगावले यांच्या रायगड जिल्ह्याचा पालकमंत्री होण्याच्या महत्त्वाकांक्षेने पुन्हा एकदा उचल खाल्ली आहे. मंत्रिपदासोबत आपल्याला रायगडचे पालकमंत्रीपद मिळणारच, हे भरत गोगावले फार पूर्वीपासूनच ठामपणे सांगत होते. त्यामुळे आता मंत्रिपदासोबत रायगडच्या पालकमंत्रीपदाची माळ आपल्या गळ्यात पडेल, असा ठाम विश्वास गोगावले यांना आहे. मात्र, अजित पवार यांच्यासोबत मंत्रिपदाची शपथ घेतलेल्या राष्ट्रवादी काँग्रेसच्या आमदार आदिती तटकरे यांचे नावही ऐनवेळी रायगडच्या पालकमंत्रीपदाच्या शर्यतीत आले आहे. अजित पवार गटाच्या दबावामुळे रायगडचे पालकमंत्रीपद तटकरे यांनाच मिळेल, अशी जोरदार चर्चा आहे. मात्र, भरत गोगावले काही केल्या पालकमंत्रीपदावरील दावा सोडायला तयार नाहीत. आपण अगदी शेवटच्या क्षणापर्यंत रायगडच्या पालकमंत्रीपदासाठी प्रयत्न करु, असा पवित्रा त्यांनी घेतला आहे. मात्र, या नादात प्रसारमाध्यमांसमोर बोलताना गोगावले यांनी एक प्रचंड वादग्रस्त वक्तव्य केले आहे.

Cabinet Expansion: दोघांत तिसरा, मंत्रिपद विसरा; भाजप आमदारांची व्यथा, मोदी@९ अभियानही थांबवलं

भरत गोगावले हे बुधवारी मुंबईत प्रसारमाध्यमांशी बोलत होते. यावेळी त्यांना रायगडच्या पालकमंत्री पदावरून छेडण्यात आले. पालकमंत्रीपद आदिती तटकरे यांनाही मिळू शकते, यावर त्यांची प्रतिक्रिया विचारण्यात आली. तेव्हा भरत गोगावले यांनी ठाम स्वरात म्हटले की, ‘मग पालकमंत्री म्हणून आम्ही काय वाईट काम करणार आहोत का? आम्ही त्यांच्यापेक्षा (आदिती तटकरे) चांगलं काम करु. महिला आणि पुरुष थोडा तर फरक येतो ना. त्याच्यामध्ये मला आमदारकीचा १५ वर्षांचा अनुभव आहे. सगळ्यांना बरोबर घेऊन आणि सहाच्या सहा आमदार आम्ही सगळेजण एकच मागणी आहे, रायगडचा पालकमंत्री, भरतशेठ’, असे गोगावले यांनी म्हटले. मात्र, बोलताना भरत गोगावले यांनी नकळतपणे महिला आणि पुरुष भेदभाव करुन नव्या वादाला तोंड फोडले आहे. त्यामुळे आता यावरुन राजकीय वाद पेटणार का, याकडे सर्वांच्या नजरा लागल्या आहेत.