मिळालेल्या माहितीनुसार, चिपळूणमधील आठ मुले सायंकाळी चार वाजण्याच्या सुमारास शिरगाव येथे फिरण्यासाठी आले होते. त्यामध्ये इब्राहिम काजोरकर, अब्रार हुसेन आंचरेकर, फरहान हिदायत पिलपिले. खाटीक अली, अली नियाज, जहिद हनीफ खान, आरमान अजीज खान, आतीक इरफान बेबल(बेपत्ता), अब्दुल कादीर नोशाद असे आठ मुले दुचाकी घेऊन फिरण्यासाठी आले होते. यावेळी शिरगाव येथील वझर याठिकाणी ते पोहण्यासाठी थांबले. यावेळी पावसाची एक मोठी सर आली. त्यातील सहा जण एका झोपडीत जाऊन थांबले. तर आतिक बेबल आणि अब्दुल कादिर लसने यांनी डोहात उडी मारली.
पोहोण्यासाठी गेले पण घरी परत येणं नशिबातच नव्हतं, जीवलग मित्रांचा बुडून मृत्यू
सदरचा डोह हा ३० ते ४० फूट खोल असून त्याच्या डोहात सापडल्यावर कोणीही वाचत नाही. त्यामुळे सदरची दोन मुले त्यात बुडाली असावी, असा प्राथमिक अंदाज व्यक्त करण्यात येत आहे. तर माहिती समजताच परिसरातील ग्रामस्थ आणि पोलीस यांनी घटनास्थळी धाव घेतली. तर चिपळूण डी वाय एस पी राजेंद्र राजमाने यांनी घटनस्थळाला भेट देऊन पाहणी केली. तसेच सदरचा पाण्याचा डोह हा खूप खोल आहे. पाण्याचा प्रवाह मोठा असल्याने एनडीआरएफ पथक बोलावण्यात आले आहे. रात्री उशिरापर्यंत शोध मोहीम सुरू होती.

कुंभार्ली ग्रामपंचायतमार्फत रात्री त्याठिकाणी विजेची व्यवस्था करून शोध मोहीम राबविण्यात आली. आतीक बेबल आणि अब्दुल कादिर लसणे दोघेही इयत्ता दहावीत शिक्षण घेत होते. घटनेची माहिती मिळताच चिपळूणमधील अनेक बांधवांनी शिरगाव पोलीस ठाण्यात भेट दिली. अधिक तपास चिपळूण पोलीस ठाण्याचे पोलिस निरीक्षक सुजित गडदे करीत आहेत. चिपळूणचे प्रांताधिकारी आकाश निगडे हे या सगळ्या प्रकरणावर लक्ष ठेवून आहेत. आपत्कालीन विभागाच्या सगळ्या यंत्रणा येथे सज्ज ठेवण्यात आले आहेत. चिपळूण नगर परिषदेचे आपत्कालीन पथकही घटनास्थळी दाखल झाले आहेत.