निखिल पाथे हा बाभूळगाव तालुक्याच्या गोंधळी गावातील रहिवासी होती. त्याच्या घरची आर्थिक परिस्थिती अत्यंत हालाखीची होती. त्यामुळे निखिलने नोकरीच्या शोधात पुण्याला जाण्याचा निर्णय घेतला. पुण्यात नोकरी मिळाल्यानंतर ५००० रुपये घरी पाठवेन, असे सांगून तो विदर्भ ट्रॅव्हल्सच्या बसने पुण्याला निघाला होता. निखिलचा भाऊ हर्षद पाथे याने अपघातानंतर प्रसारमाध्यमांशी संवाद साधला. यावेळी हर्षद याने सांगितले की, निखिल नोकरीसाठी पुण्याला जात होता. काल संध्याकाळी आम्ही त्याला बसमध्ये बसवून दिले. त्याचं ग्रॅज्युएशन झालं होतं. काल संध्याकाळी त्याला बसमध्ये बसताना पैसे हवे होते. पण तेव्हा माझ्याजवळ कॅश नव्हती. मी त्याला म्हणालो की, तू पुण्याला जा, मी उद्या सकाळी तुला पैसे पाठवतो. यानंतर आज सकाळी मी निखिलला पैसे पाठवण्यासाठी फोन केला. त्यावेळीच बुलढाण्यातील अपघातात बस जळून खाक झाल्याची बातमी मला समजली. यानंतर बाकीच्यांचे फोन येण्यास सुरुवात झाली आणि अपघातामध्ये निखिलचा मृत्यू झाल्याचे आम्हाला समजले, असे हर्षद पाथे याने सांगितले.

दत्तक घेतलेल्या लेकीला घेऊन प्रवासाला निघाले, बुलढाणा अपघातात लहानग्या ओवीसह आई-आजीचा मृत्यू

समृद्धी महामार्गावर झालेली घटना ही दुर्दैवी: अशोक चव्हाण

समृद्धी महामार्गावर झालेली घटना ही दुर्दैवी आहे. अपघात मृत्यू पावलेल्या कुटुंबीयांच्या दुःखात मी सहभागी आहे, अशी प्रतिक्रिया देत माजी मुख्यमंत्री अशोक चव्हाण यांनी मृत्यू झालेल्याना श्रद्धांजली वाहिली. दरम्यान समृद्धी महामार्गचे एव्हढ्या घाईने उदघाटन करण्याची गरज नव्हती. गाड्या अतिशय वेगाने जात आहेत. कुठलीही उपाय योजना न करता,अशी होणारी सुरुवात ही चुकीची आहे. या मार्गावर प्रतिबंधक उपाय योजना करण्याची गरज आहे.या मार्गावर अनेक अपघात झालेले आहेत. त्यामुळे लोकांच्या जीवाशी न खेळता सरकारने हा विषय गांभीर्याने घ्यावा.अशी प्रतिक्रिया अशोक चव्हाण यांनी दिली. कुठलेलंही राजकारण आम्हाला यात आणायचं नाही आणि कुणी आणू पण नये. परंतु लोकांचे या मार्गावर होणारे मृत्यू हे गंभीर बाब आहे. त्यामुळे या मार्गावर आवश्यक ते उपाय सरकारने तातडीने केले पाहिजे, अशी आमची मागणी असल्याचे अशोक चव्हाण म्हणाले.