याबाबत घटनास्थळावरून मिळालेल्या माहितीनुसार, विहे गावच्या हद्दीत गुहागर-विजापूर राष्ट्रीय महामार्गापासून शंभर फुटावर विहीर आहे. या विहिरीला सुरक्षा कठडे नाहीत. मंगळवारी सायंकाळी कराडहून पाटणच्या दिशेने निघालेली एक भरधाव जीप महामार्गावरून थेट त्या विहिरीत कोसळली. ही घटना काही प्रवाशांनी पाहिल्यावर या अपघाताबाबतची माहिती परिसरातील ग्रामस्थांना तसेच पोलिसांना देण्यात आली. घटनेची माहिती मिळताच मल्हारपेठ पोलीस ठाण्याचे अधिकारी व कर्मचारी घटनास्थळी दाखल झाले.
संततधार पावसामुळे बचाव कार्यात पोलिसांना अडथळे येत होते. रात्री उशिरापर्यंत विहिरीतील पाणी पंपाद्वारे बाहेर काढण्याचे काम सुरू होते. विहिरीतील पाणी कमी झाल्यानंतर जीप क्रेनच्या साह्याने विहिरीतून बाहेर काढली. यावेळी पोलिसांना मृतदेह आढळून आला. ओळख पटवली असता तो मृतदेह संभाजी पवार यांचा असल्याचे निष्पण्ण झाले. पवार हे या वाहनाचे मालक असून ते स्वत: गाडी चालवत असल्याची मल्हारपेठ पोलिसांकडून माहिती दिली. मात्र, जीपमध्ये कोणीच प्रवाशी आढळून न आल्याने विहरीत शोध घेतला जात आहे.