व्हिआयपी मार्गावरील दुकाने बंद
सोलापूर विमानतळापासून ते रेल्वे स्थानक व बस स्थानकापर्यंत व्हिआयपी मार्ग आहे. मुख्यमंत्री असो किंवा इतर मंत्री असो, सर्व नेते मंडळींचा ताफा याच मार्गावरून जातो. रविवारी दुपारी अचानकपणे मुख्यमंत्री एकनाथ शिंदे सोलापूर मार्गे पंढरपूरकडे जाणार असल्याने प्रशासनाची सर्व प्रशासकीय यंत्रणा कामाला लागली होती. विमानतळापासून व्हिआयपी मार्गावरील सर्व दुकाने दुपारपासून बंद करण्याच्या सूचना पोलिसांनी दिल्या होत्या. पोलिसांनी दुकाने बंद करायला लावल्यामुळे व्यापाऱ्यांनी तीव्र नाराजी व्यक्त केली.
मुख्यमंत्र्यांनी पंढरपूरमध्ये केली तयारीची पाहणी
सोलापूर शहरातून जाताना मुख्यमंत्री एकनाथ शिंदेंचा ताफा भैय्या चौक येथील दिलीप कोल्हे यांच्या परिसरात थांबला. त्याठिकाणी त्यांचा सत्कार करून पंढरपूरच्या विठ्ठल मंदिराकडे एकनाथ शिंदे रवाना झाले. आषाढी वारीनिमित्ताने मुख्यमंत्र्यांनी पंढरपूर येथील नियोजनाबाबत जिल्हाधिकारी, जिल्हा आरोग्य अधिकारी, मुख्य कार्यकारी अधिकारी, पोलीस अधीक्षक यांसोबत चर्चा केली. विठ्ठल मंदिरात जाऊन दर्शन घेतले. आणि मुंबईकडे रवाना झाले.