माणसाच्या विकासाबरोबर बदल अपेक्षित करणारा असा अभंग म्हणत शारदा प्रांगणात पालखी येताच पुंडलिक वरदा..हरी विठ्ठल ! श्री ज्ञानदेव तुकाराम ! असा जयघोष करून खांदेकऱ्यांनी पालखी मंडपात स्थानपन्न केली. बारामती शहर आणि परिसरातील विविध सामाजिक आणि सांस्कृतिक संस्था आणि संघटनांतर्फे उपवासाचे पदार्थ देऊन वारकर्‍यांची सेवा केली. दुपारनंतर शहरातील श्री विठ्ठल-रुक्मिणी मंदिर, श्रीराम मंदिर, सिद्धेश्वर मंदिरासह सर्व मंदिरांमध्ये वैष्णव विसावले.

थोडा विसावा घेऊन वारकरी पुन्हा भजन आणि किर्तन करीत हरिनामामध्ये दंग झाले. दरवर्षीच पालखी सोहळ्यात मोठ्या प्रमाणात तरुणाईची गर्दी उसळते. यंदाही तरुणांनी मोठ्या प्रमाणात गर्दी केली. महाविद्यालयीन तरुण-तरुणी, आयटी क्षेत्रातील नोकरदारांनी अनुपम पालखी सोहळ्याचा आनंद घेत पालखीत सहभागी झाले होते.