नागपुरात एलपीजी सिलिंडरची साठेबाजी आणि काळाबाजार करणाऱ्यांविरुद्ध जिल्हा प्रशासन आणि पोलिसांनी मोठी मोहीम उघडली आहे. जिल्हाधिकारी विपीन इटनकर आणि पोलीस आयुक्त रवींद्र कुमार सिंगल यांच्या आदेशानुसार शहरात गॅस गोदामांची झाडाझडती सुरू असून, दोषींवर कठोर कारवाईचा इशारा देण्यात आला आहे.
तक्रारीनंतर प्रशासनाची कारवाई
नागपूर शहरात एलपीजी सिलिंडरचा तुटवडा निर्माण होत असल्याच्या तक्रारी मागील काही दिवसांपासून समोर येत होत्या. काही ठिकाणी घरगुती आणि व्यावसायिक सिलिंडर चढ्या दराने विकले जात असल्याचीही माहिती प्रशासनाला मिळाली होती. या पार्श्वभूमीवर नागपूर पोलिसांनी विशेष तपास मोहीम सुरू केली आहे. पोलीस आयुक्त डॉ. रवींद्र कुमार सिंगल यांनी सर्व पोलीस ठाण्यांना त्यांच्या हद्दीत बेकायदेशीरपणे सिलिंडर विक्री करणाऱ्यांवर आणि साठेबाजी करणाऱ्यांवर कठोर कारवाई करण्याचे आदेश दिले आहेत.
गॅस एजन्सी आणि गोदामांची तपासणी
नागरी पुरवठा विभागाच्या अधिकाऱ्यांनी नागपूरमधील सदर परिसरातील एका डोमेस्टिक गॅस एजन्सीच्या कार्यालयात जाऊन तपासणी केली. त्यानंतर जरीपटका येथे असलेल्या त्या एजन्सीच्या गोदामात प्रत्यक्ष पाहणी करण्यात आली. गोदामात दाखवलेला गॅस सिलिंडरचा साठा आणि प्रत्यक्ष वितरण यामध्ये ताळमेळ आहे का, याची सविस्तर तपासणी करण्यात आली. या तपासणीचा अहवाल जिल्हाधिकाऱ्यांना सादर करण्यात येणार असल्याची माहिती अधिकाऱ्यांनी दिली.
LPG Shortage : आखाती युद्धाचा थेट फटका! अहिल्यानगर MIDC मधील 300 उद्योग ठप्प; 3 हजार कामगार बेकार होण्याची शक्यता
कमर्शियल सिलिंडर वापराबाबतही चौकशी
तपासणीदरम्यान काही ठिकाणी पाच किलोच्या सिलिंडरसह अनेक कमर्शियल सिलिंडरही आढळून आले. त्यामुळे सिलिंडरचा वापर नियमानुसार होत आहे का, तसेच घरगुती गॅसचा वापर व्यावसायिक कारणांसाठी तर होत नाही ना, याचीही तपासणी केली जात आहे. नागरी पुरवठा विभागाचे तीन निरीक्षक आणि दोन परिमंडळ अधिकारी अशा पथकाद्वारे शहरातील विविध भागांमध्ये ही तपास मोहीम राबवली जात आहे.
पोलिसांची विशेष नजर
दरम्यान, पोलिसांकडूनही या संपूर्ण प्रकरणावर बारकाईने लक्ष ठेवण्यात येत आहे. गुन्हे शाखेची विशेष पथके शहरातील संशयास्पद ठिकाणांवर नजर ठेवून आहेत. तसेच एलपीजी वितरण केंद्रांची नियमित तपासणी करण्याचे आदेश देण्यात आले आहेत. आवश्यक असल्यास संशयास्पद गोदामांवर अचानक छापे टाकण्याची तयारीही पोलिसांनी ठेवली आहे.
Solapur News : फेरीवाल्यांचा संताप अनावर, पोलिसांसोबत आंदोलकांची झटापट; सोलापूर महापालिकेसमोर हायव्होल्टेज ड्रामा
नागरिकांनाही आवाहन
याशिवाय, यापूर्वी एलपीजी सिलिंडरच्या काळाबाजारात किंवा अवैध व्यापारात सहभागी असलेल्या व्यक्तींची यादीही पोलिसांनी तयार केली आहे. अशा व्यक्तींच्या हालचालींवर विशेष लक्ष ठेवले जात आहे. साठेबाजी किंवा अवैध विक्री करताना कोणी आढळल्यास त्यांच्यावर कडक कायदेशीर कारवाई केली जाईल, असा इशाराही पोलिसांनी दिला आहे.
दरम्यान, प्रशासनाने नागरिकांनाही आवाहन केले आहे की, कुठेही गॅस सिलिंडरचा काळाबाजार किंवा साठेबाजी होत असल्याची माहिती मिळाल्यास तात्काळ जवळच्या पोलीस ठाण्याला किंवा प्रशासनाला कळवावे. नागरिकांच्या सहकार्यामुळेच अशा अवैध प्रकारांना आळा घालणे शक्य होईल, असेही प्रशासनाने स्पष्ट केले आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा