नाशिकः दिंडोरी – नाशिक रस्त्यावरील रणतळेजवळ बससह बोलेरो आणि अल्टो कार या तीन वाहनांमध्ये विचित्र अपघात झाला आहे. सुदैवाने यात जीवीतहानी झाली नाही. मात्र बस आणि वाहनांचे मोठ्या प्रमाणात नुकसान झाले आहे. या विचित्र तिहेरी अपघाताने खळबळ उडाली आहे.
दिंडोरीकडून नाशिककडे जाणारी बस क्रमांक (एमएच ४० एन ९४३२) ही बस रणतळेजवळील चढ चढत असतांना समोरुन नाशिकहून दिंडोरीच्या दिशेने उताराला भरधाव वेगाने येत असलेली बोलेरो क्रमांक (एमएच १५ बीसी ६२२६) या वाहनावरील चालकाचा ताबा सुटला. यामुळे बसच्या पुढील आणि मागच्या चाकाला धडक दिल्याने बस रस्त्याच्या कडेला पलटी झाली. त्यात एकुण ३४ प्रवाशी प्रवास करीत होते. त्यात चार ते पाच प्रवासी किरकोळ जखमी झाल्याची माहिती मिळाली आहे. तसेच बसच्या मागे असलेली अल्टो कार क्रमांक (एमएच ०५ सीए १४४९ ) ही देखील बसला मागून धडकली.
सुदैवाने या या विचित्र तीन वाहनांच्या अपघातात कोणतीही जीवीतहानी झाली नाही. परंतु बससह तीनही वाहनांचे मोठ्या प्रमाणात नुकसान झाले आहे. अपघातानंतर बसमधील प्रवाशांमध्ये देखील प्रचंड घबराटीचे वातावरण पसरले होते. अपघातानंतर नाशिक दिंडोरी महामार्गावरील वाहतूक देखील काही काळ खोळंबली होती. या तीन वाहनांच्या विचित्र अपघातानंतर घटनास्थळावर देखील मोठ्या प्रमाणात गर्दी जमली होती. या घटनेची माहिती मिळताच दिंडोरी पोलीस ठाण्याचे पोलीस कर्मचारी घटनास्थळी दाखल झाले. याबाबत दिंडोरी पोलीस ठाण्यात गुन्हा दाखल करण्यात आला असून पुढील तपास पोलिस निरीक्षक प्रमोद वाघ यांच्या मार्गदर्शनाखाली दिंडोरी पोलीस करत आहेत.