पिंपरी : शहरात गेल्या काही दिवसांपासून खुनाच्या घटनांमध्ये वाढ झाली आहे. चिखली येथील खुनाची घटना ताजी असतानाच भोसरी परिसरात मस्करीमध्ये मित्राच्या खिशातला मोबाईल काढल्याच्या कारणावरून एका तरुणाची डोक्यात दगड घालून हत्या केल्याची घटना समोर आली आहे. या घटनेने भोसरी परिसरात एकच खळबळ उडाली आहे.नारायण वसंत वाघमारे असे खून झालेल्या तरुणाचे नाव आहे. भोसरी परिसरातील इंद्रायणी नगर येथे ही घटना घडली आहे. पोलिसांनी घटनेची दखल घेत अमर उर्फ एकक्या गौतम कसबे (वय २४) याला ताब्यात घेतले आहे. मृताचा भाऊ भगवान वसंत वाघमारे यांनी एमआयडीसी भोसरी पोलीस ठाण्यात फिर्याद दिली आहे.

नवरा बाहेरगावी, मुलगा नातेवाईंकाकडे, व्हॉट्सअप स्टेटसला पतीचा फोटो लावून नर्सकडून आयुष्याचा शेवट!
नेमकी घटना काय?

याबाबत पोलिसांनी दिलेली माहिती अशी की, नारायण वाघमारे आणि अमर कसबे हे शुक्रवारी दुपारच्या सुमारास इंद्रायणी नगर येथे असणाऱ्या चौकात गप्पा मारत बसले होते. त्यावेळी नारायण याने मस्करीमध्ये अमरच्या खिशातील मोबाईल काढला. मात्र अमर याला आपल्या खिशातून मोबाईल काढल्याचे आवडले नाही. याच गोष्टीचा राग मनात धरून अमर याने नारायणाला मारण्यास सुरुवात केली.

अचानक ॲक्सिलेटर फेल, ड्रायव्हर-कंडक्टरचं जुगाड, दोरी बांधली अन् बस पळवली, सांगलीचा Video राज्यभर चर्चेत
त्याला मारहाण करत खाली जमिनीवर पाडले. त्यानंतर रागाच्या भरात नारायण याच्या डोक्यात बाजूला असलेला दगड घातला. रक्ताच्या थारोळ्यात पडलेल्या नारायणला रुग्णालयात दाखल करण्यात आले. मात्र आज सकाळी त्याचा उपचारादरम्यान मृत्यू झाला असल्याचे डॉक्टरांकडून सांगण्यात आले.

पिंपरी चिंचवड शहर आणि परिसरात खुनाच्या घटनांमध्ये वाढ होत आहे. शिरगाव, तळेगाव चिखली आणि आता भोसरी या भागात खुनाच्या घटना घडल्या आहेत. पोलिसांच्या कार्यक्षमतेवर यामुळे प्रश्न चिन्ह निर्माण होऊ लागले आहे.