बारामती : बारामती शहरातील पेन्सिल चौकात डंपर व दुचाकीत झालेल्या भीषण अपघातामध्ये दोन युवकांचा मृत्यू झाला आहे. आज दुपारी तीनच्या सुमारास हा अपघात झाला. प्रतीक विजय भोसले (वय २०) व निखिल सौताडे (वय २०),( दोघेही रा. दुधोडी, ता. कर्जत, जि.नगर) अशी अपघातात मृत्यू झालेल्या युवकांची नावे आहेत. दुचाकीवरील संदेश कुंभार या युवकाने अपघात होण्याआधी दुचाकीवरून उडी मारल्याने तो बचावला.अधिक माहिती अशी की, निखिल सौताडे हा युवक भारतीय सैन्य दलात भरती झाला होता. निखिलने ऑनलाईन मोबाईल मागवला होता. हा मोबाईल घेण्यासाठी वरील तिघे मित्र मोटर सायकल वरून मोबाईल घेण्यासाठी निघाले होते. दरम्यान, बारामती शहराच्या बाजूकडून आरटीओ कार्यालयाकडे जात असणाऱ्या डंपरच्या समोर या युवकांची दुचाकी आल्याने हा दुर्दैवी अपघात झाल्याचे प्रत्यक्षदर्शींनी सांगितले.
Accident News: मुंबई-पुणे द्रुतगती मार्गावर कंटेनरचा ब्रेक फेल, लागोपाठ ७ वाहनांना उडवलं; गाड्यांचा भूगा
अपघातात मृत्यू झालेला प्रतीक विजय भोसले हा युवक येथील विद्या प्रतिष्ठान महाविद्यालयाचा विद्यार्थी होता. हे तिघे ही एकाच रूमवर वास्तव्यास होते, अशी माहिती समोर आली आहे. या अपघातामध्ये प्रतीक व निखिल यांच्या अंगावरून डंपरचे चाक गेल्यामुळे त्यांचा या अपघातात मृत्यू झाला.दोन्ही युवकांचा अकाली मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. या अपघातात मृत्यू झालेला निखिल हा त्याच्या आईला बारामतीत दवाखान्यात घेऊन आला होता व उद्या ते पुन्हा गावी परत जाणार होते. त्याचे नुकतेच लग्न ठरलेले होते, अशीही माहिती पुढे आली आहे. या अपघातानंतर अपघातातून बचावलेल्या संदेश कुंभार याला देखील कमालीचा मानसिक धक्का बसला होता.
