मुंबई : राष्ट्रवादी काँग्रेसचे नेते, पदाधिकारी आणि कार्यकर्ते…. ज्या क्षणासाठी गेल्या चार दिवसांपासून वाट पाहत होते तो क्षण अखेर आला आणि पवारांनी राजीनामा मागे घेतल्याची घोषणा होताच पत्रकार परिषदेत टाळ्यांचा कडकडाट झाला. शरद पवारांनंतर राष्ट्रवादी काँग्रेसमधील सर्वात प्रबळ नेते आणि पवारांचे पुतणे अजित पवारच गैरहजर राहिल्याने सर्वांच्याच भुवया उंचावल्या होत्या. पण असं असतानाही शरद पवारांनी पत्रकार परिषदेला सुरुवात करण्याआधी जयंत पाटील कुठे आहेत असा सवाल केला आणि या सगळ्यात पुन्हा एकदा चर्चेला आले ते सांगलीचे जयंतराव…. पत्रकार परिषदेआधी नेमंक काय घडलं?शरद पवारांच्या पत्रकार परिषदेची वेळ म्हणजे घडाळ्याचा ठोका ना इकडे होत ना तिकडे. पण यावेळी मात्र वेगळंच घडलं. त्याचं कारणं ठरले ते राष्ट्रवादीचे प्रदेशाध्यक्ष जयंत पाटील. पत्रकार परिषदेची वेळ आधी ५ वाजताची दिली होती. मग वेळेत बदल झाला आणि पत्रकार परिषद ५.३० वाजता होईल, असं पक्षाकडून सांगितलं गेलं. या सगळ्यात ५.१५ वाजेपर्यंत सगळे नेते वाय.बी सेंटर झाले होते.

पत्रकार परिषदेस्थळी सुप्रिया सुळेंनी सगळी पाहणी करत सर्वांना बसण्याची व्यवस्था योग्य आहे ना… याची तपासणी केली. तेवढ्यातच बाहेर शरद पवारांचं आगमन झालं. थोड्याच वेळात पवार आतमध्ये आले. सर्व मीडियाचं लक्ष अजितदादांच्या उपस्थितीकडे होतं. पण दादा काही आले नाही. दुसरीकडे शरद पवार आले तरी जयंत पाटीलही उपस्थित झाले नव्हते. संशयाची पाल चुकचुकली… शरद पवारांनी स्थानापन्न झाल्यानंतर बाजूला असलेल्या प्रफुल्ल पटेल यांना पहिला सवाल केला- जयंत पाटील आले नाहीत..? त्यावर प्रफुल्ल पटेल म्हणाले.. निघालेत… पोहचतीलच काही मिनिटांत. पवारांनी विचारलेला हाच सवाल सर्वाच्या भुवया उंचवणारा ठरला.

पवारांचं लक्ष होतं ते जयंत पाटील यांच्या उपस्थितीकडे… त्यांचे डोळे लागलेले ते डाव्या बाजूला असलेल्या दरवाजाकडे… अखेर शरद पवारांनीच माईक घेत समोर बसलेल्या मीडियाला सांगून दिलं. जयंतराव पाटील येतायंत…. इथे जवळच आहेत… कॉर्नरला आहेत.. दोन तीन मिनिटं वाट पाहिल्यानंतर जयंतराव आले, असा आवाज कोणीतरी दिला आणि पवारांनी मान फिरवली. जयंत पाटील आल्यानंतर थेट शरद पवारांच्या खुर्चीच्या शेजारी आले, तिथेच स्थानापन्न झाले. आणि मग शरद पवारांनी बोलायला सुरुवात केली.

एकीकडे अजितदादांची पत्रकार परिषदेला असलेली अनुपस्थिती हा राजकीय वर्तुळासाठी चर्चेला विषय ठरलेला असला पवारांनी मात्र जयंत पाटलांसाठी ५ मिनिटे पत्रकार परिषद थांबवली… त्यामुळे जयंत पाटलांचं पक्षात वजन किती आहे, तेच यावरुन दिसून येतं.