नागपूर: राष्ट्रवादीचे सर्वेसर्वा शरद पवार यांनी पक्षाच्या अध्यक्षपद सोडत असल्याची घोषणा करत राज्याच्या नाही तर संपूर्ण देशाच्या राजकारणात खळबळ माजवून दिली. यामुळे राष्ट्रवादीच्या नेते मंडळी आणि कार्यकर्त्यांना तर शॉक लागलाच पण राज्यातील इतर राजकीय पक्षानांही धक्का बसला. यावर राज्याचे उपमुख्यमंत्री आणि भाजप नेते देवेंद्र फडणवीस यांनीही यावर आपली पहिली प्रतिक्रिया दिली आहे. सध्या या विषयावर बोलणे योग्य नाही, असं देवेंद्र फडणवीस म्हणाले. तसेच, त्यांनी यावेळी एक मोठी घोषणाही केली.’शरद पवार साहेबांचा हा वैयक्तिक निर्णय आणि राष्ट्रवादीची अंतर्गत बाब आहे. त्यावर बरीच चर्चा आणि मंथन सुरु आहे. या क्षणाला मी आताच त्यावर बोलणे योग्य नाही. आम्ही परिस्थितीवर लक्ष ठेवून आहोत. योग्यवेळी त्यावर बोलू. मी अजून शरद पवार यांचे पुस्तक वाचलेले नाही. त्यामुळे त्यावर आताच बोलणार नाही. मलाही एक पुस्तक लिहायचे आहे, ते योग्य वेळी लिहिणार आहे. त्यात त्यांनी काय म्हटले आहे आणि सत्य काय आहे, हे मी त्यात मांडेन’, असं देवेंद्र फडणवीस म्हणाले.
शरद पवारांच्या घोषणेने राष्ट्रवादी पक्षातील कार्यकर्त्यांमध्ये खळबळ
‘लोक माझे सांगाती’ या आपल्या राजकीय आत्मकथेच्या नव्या आवृत्तीच्या प्रकाशन समारंभात शरद पवार यांनी राष्ट्रवादी पक्षाच्या अध्यक्षपदावरून पायउतार होत असल्याचा निर्णय जाहीर केला. पवारांनी ही घोषणा करताच नेते आणि कार्यकर्त्यांमध्ये एकच गोंधळ माजला. ज्यांनी राष्ट्रवादी काँग्रेस पक्षाची स्थापना केली त्या शरद पवारांनीच अध्यक्षपदाचा राजीनामा देण्याचा निर्णय घेतल्याने नेते आणि कार्यकर्त्यांना धक्का बसला.
कार्यकर्त्यांने आधी विनंती केली, मग आक्रमक होताच पवारांकडे पाहत स्वतःला घेतलं मारून
हे ऐकताच अनेकांच्या डोळ्यातून घळाघळा अश्रू वाहू लागले. नेत्यांच्याही डोळ्यात पाणी दाटून आलं, सगळे शरद पवारांकडे निर्णय मागे घेण्याचा हट्ट करु लागले. जोपर्यंत तुम्ही निर्णय मागे घेणार नाही तोपर्यंत आम्ही इथून हटणार नाही असं कार्यकर्ते म्हणून लागले. तेव्हा अजित पवारांनी कार्यकर्त्यांना खडसावलं.
तरीही कार्यकर्ते ऐकायला तयार नव्हते. अखेर शरद पवार हे त्यांच्या सिल्वर ओक या निवासस्थानी निघून गेले. इकडे वाय. बी. चव्हाण सेंटरबाहेर राष्ट्रवादीच्या कार्यकर्त्यांनी गोंधळ घालण्यास सुरुवात केली तेव्हा अजित पवार आणि सुप्रिया सुळे यांनी शरद पवारांशी चर्चा करण्याचं आश्वासन कार्यकर्त्यांना दिलं. चर्चेनंतर शरद पवारांनी विचार करण्यासाठी दोन-तीन दिवसांचा वेळ मागितल्याचं दादांनी कार्यकर्त्यांना सांगितलं आणि त्यानंतर कार्यकर्त्यांना घरी जाण्यास सांगितलं.
दादांच्या भाजपसोबत जाण्याच्या चर्चा की सुप्रियांना अध्यक्ष करायचंय? शरद पवारांच्या घोषणेमागच्या ५ शक्यता