पुणे : लग्नाचे आमिष दाखवून मध्य प्रदेशात विकण्यात आलेल्या अल्पवयीन मुलीला न्याय देण्यासाठी, आरोपींशी संबंधित कंपनीला जाब विचारण्यासाठी पुण्यातील मनसे नेते वसंत मोरे गेले होतो. परप्रांतीय नागरिकांना कामाला ठेवण्यापूर्वी त्यांची पूर्ण माहिती करून घेतली होती का? त्यांचं पोलीस व्हेरिफिकेशन केलं होतं का? असे प्रश्न मोरेंनी विचारले. सिक्युरिटीने कंपनीच्या गेटवरुन पीडित मुलीच्या आई-वडिलांना हाकलून दिलं होतं. हा सगळा प्रकार माझ्या भागात घडला आहे. म्हणून योग्य तो न्याय त्यांच्या कुटुंबियांना द्यावा नाही तर मनसे स्टाईल आंदोलन करू असा थेट इशारा वसंत मोरे यांनी दिला आहे.
नेमकी घटना काय घडली होती
तुझ्या मित्राचं लग्न आहे, त्याने तुला लग्नाला बोलावलं आहे, अशी फूस लावून एका ४० वर्षीय महिलेने १४ वर्षांच्या अल्पवयीन मुलीला मध्य प्रदेशला नेले. तिचा ५० हजारात सौदा करुन एका अनोळखी व्यक्तीसोबत लग्न लावून दिलं. हा धक्कादायक प्रकार काही दिवसांपूर्वी उघडकीस आला. हा सगळा प्रकार पुण्यातल्या एका कंपनीत घडला, जिथे पीडित मुलगी तिच्या बहिणीला शाळेत जाताना डब्बा देत असायची, त्याच कंपनीत आरोपी महिलाही काम करत होती.
तिने पीडित मुलीशी ओळख करून विश्वास संपादन केला आणि मित्राचं लग्न आहे, म्हणून मध्य प्रदेशला घेऊन गेली. आरोपी महिलेचा एका तरुणासोबत लग्नासाठी मुलगी पाहिजे म्हणून ५० हजारांचा सौदा झाला होता, त्यानंतर पीडितेचं लग्न एका अनोळखी मुलाशी लावून दिलं. हा प्रकार जानेवारी 2023 ते मार्च 2023 या कालावधीत घडला, दोन महिने मुलगी तिथे राहिली होती, या दरम्यान मुलीला दमदाटी व धमकी देऊन मुलाला सोबत राहण्यास भाग पाडलं होतं, पोलिसांनी या घटनेचा तपास करत दोन महिन्यात छडा लावला. मुलीला सुखरूप कुटुंबीयांकडे स्वाधीन केलं आणि आरोपींना अटक केली.
हे प्रकरण घडल्यानंतर वसंत मोरे यांनी अनेकदा आरोपींची माहिती कंपनीकडे मागितली होते. मात्र कंपनीने उडवाउडवीचे उत्तर देऊन, टाळाटाळ केली होती. प्रकरण उघडकीस आल्यानंतर पाहिजे असलेली माहिती मोरे यांना पोलिसांकडून मिळाली. मात्र त्यानंतर मोरे हे चांगलेच आक्रमक झाले, थेट कंपनीमध्ये जाऊन संबंधित मॅनेजर व कर्मचारी यांना जाब विचारला. कंपनीमध्ये कामाला ठेवण्यापूर्वी तुम्ही परप्रांतीय नागरिकांचे पूर्ण कागदपत्र पडताळणी केली होती का? त्यांचे पोलीस वेरिफिकेशन केलं होतं का? असे अनेक प्रश्न विचारले. आपल्या भागातील मुलीला फूस लावून परराज्यात विकण्याचा प्रकार घडत आहे, हाच प्रकार जर तुमच्या आमच्या मुली सोबत घडला असता तर काय केलं असतं ? असे बोलून मोरे यांनी कंपनीच्या अधिकाऱ्यांना सुनावले. संबंधित मुलीचे आई वडील कंपनीत आल्यानंतर सिक्युरिटीने त्यांना गेटमधूनच हाकलून दिलं होतं. असा का घडलं, असे प्रकार माझ्या भागात चालणार नाही, असा थेट इशारा वसंत मोरे यांनी दिला आहे. यासोबत पीडित मुलीच्या आई-वडिलांना कंपनीमार्फत पूर्णपणे मदत झाली पाहिजे अशी मागणी केली.
पत्नीच्या समोर तिच्या नवऱ्याला मारणारे जितेंद्र आव्हाड,शाहू-फुलेंचे विचार सांगतात | नरेश म्हस्के
आमचे साहेब परप्रांतीयांविषयी एवढे बोलतात, ते उगाच बोलत नाही. अशी गुन्हेगारी प्रवृत्तीची माणसं सगळ्या परप्रांतीयांचं नाव खराब करतात. म्हणून आम्हाला आक्रमक भूमिका घ्यावी लागते. यापुढे कोणताही माणूस कंपनीमध्ये काम करण्यासाठी घेताना पूर्ण चाळूनच तुम्हाला घ्यावा लागेल. अन्यथा आम्ही मनसे स्टाईल आंदोलन करायला आताही कमी करणार नाही. असा थेट इशारा मनसेचे फायर ब्रँड नेते वसंत मोरे यांनी दिला आहे.