दंगल भाजप पुरस्कृत

मुंबई : संभाजीनगरमध्ये येत्या २ तारखेला महाविकास आघाडीची सभा होणार असून, ही सभा होऊ नये म्हणूच संभाजीनगरात तणाव निर्माण करण्यात आला आहे. संभाजीनगरसह देशात ज्या दंगली झाल्या त्या भाजप पुरस्कृत होत्या, असा आरोप खासदार संजय राऊत यांनी शुक्रवारी केला. राज्यातील शिंदे-फडणवीस सरकारची शेवटची धडपड सुरू आहे, अशी टीकाही त्यांनी केली.

संभाजीनगरात दोन्ही धर्मांच्या लोकांनी सामंजस्याची भूमिका घेतली. त्यामुळे संभाजीनगरात मोठी दंगल झाली नाही. येत्या दोन एप्रिलला रोजी महाविकास आघाडीची संभाजीनगरात सभा आहे. ती होऊ नये, कायदा सुव्यवस्थेच्या नावाखाली सभा होऊ नये, त्यासाठी कारस्थान सुरू आहे. काल मुंबईतही मालवणीतही दोन गटात तणाव झाला. यापूर्वी रामनवमी होत होती. गुढी पाडवा होत होता. पण खेड, मालेगावमध्ये आमच्या सभेला लोकांचा जो प्रतिसाद मिळत आहे. ते पाहिल्यावर काही लोकांच्या पायाखालची वाळू सरकली आहे. कारण नसताना जातीय धार्मिक तेढ निर्माण केली जात आहे. हा त्यांच्या नपुंसकतेचा पुरावा आहे, अशी टीका संजय राऊत यांनी केली. राज्यात दंगली घडवल्या जात आहेत. दंगली घडवणाऱ्यांवर कारवाई केली जात नाही; पण काहीही केले तरी आमची सभा होणारच. महाविकास आघाडीचे नेते या सभेला हजर राहतीलच असे राऊत यांनी स्पष्ट केले.

विरोधकांवर खोट्या कारवाया करणे, जुनी प्रकरणं काढून गुन्हे दाखल करणे सुरू आहे. या राज्यात असे कधीही झाले नव्हते. मात्र, लक्षात ठेवा डाव उलटा पडला तर उद्या आम्ही सत्तेवर येऊ. तेव्हा तुम्हाला याची उत्तरे द्यावी लागतील. खासकरून पोलिसांना, असा इशाराही राऊत यांनी दिला. उद्धव ठाकरे मुख्यमंत्री असताना महाराष्ट्रात दंगल झाली नाही. तेव्हाही रामनवमी होतीच ना. तुमच्याच राज्यात दंगल का होते? कारण तुम्ही काही लोकांना दंगलीसाठी पुरस्कृत करीत आहात. समाजात तेढ निर्माण केली जात आहे. त्यांना शांतता नको आहे. उद्धव ठाकरेंना मोठा पाठिंबा मिळत आहे. त्यांना भविष्य दिसत आहे, त्यासाठीच त्यांची शेवटची धडपड सुरू आहे, असा टोलाही त्यांनी चढवला.