अन्न आणि औषध प्रशासनाने मुंबईतील जोगेश्वरीत एका सौंदर्य प्रसाधनांच्या दुकानावर अचानक धाड टाकली. यावेळी अधिकाऱ्यांनी दुकानातील सर्व वस्तूंची तपासणी केली. या तपासणीत अधिकाऱ्यांना काही त्रुटी आढळल्या. या त्रुटींची गंभीर दखल घेत अधिकाऱ्यांनी तब्बल 10 लाख 93 हजार 692 किंमतीचे विनालेबल टॉयलेट साबण जप्त केले आहेत. अधिकाऱ्यांना या दुकानात आवश्यक लेबल माहितीशिवाय विक्रीसाठी ठेवलेला माल आढळला. त्यामुळे अधिकाऱ्यांनी या प्रकरणी मोठी कारवाई केली.

कारवाईत अधिकाऱ्यांना नेमकं काय आढळलं?

अन्न आणि औषध प्रशासनाकडून प्रसिद्धी पत्रक जारी करुन या कारवाईबाबत माहिती देण्यात आली आहे. एफडीएने 14 जुलैला जोगेश्वरी पश्चिमेतील जे. के. सोप बाजार या दुकानावर छापा टाकला. यावेळी संबंधित आस्थापनामध्ये विनालेबल (Unlabelled) टॉयलेट साबण साठवून विक्रीसाठी ठेवलेला असल्याचे निदर्शनास आले. जप्त करण्यात आलेल्या साबणांवर बॅच/लॉट क्रमांक, उत्पादन दिनांक, वापरण्याची अंतिम मुदत (Use Before), उत्पादन परवाना क्रमांक तसेच उत्पादकाचे नाव व पत्ता यांसारखी कायद्याने आवश्यक असलेली माहिती नमूद करण्यात आलेली नव्हती.

टॉयलेट साबणाचे नमुने चाचणीसाठी घेतले

अशा प्रकारे आवश्यक लेबलिंगविना प्रसाधनांची विक्री करणे हे कायद्याचे उल्लंघन आहे. या कारवाईत अंदाजे 10,93,692 किंमतीचा टॉयलेट साबण जप्त करण्यात आला. पुढील तपासासाठी टॉयलेट साबणाचे दोन नमुने विश्लेषणासाठी घेण्यात आले आहेत. या प्रकरणी नबी उल्लाह नावाच्या व्यक्तीवर कायदेशीर कार्यवाही केली जात असल्याची माहिती एफडीएने दिली आहे.

टॉयलेट साबण म्हणजे काय?

टॉयलेट साबण म्हणजे वैयक्तिक स्वच्छतेसाठी जसे की शरीर, हात, पाय आणि चेहरा यांच्यासाठी वापरला जाणारा साबण. खरंतर टॉयलेट हा आज इंग्रजी शब्द असला तरी तो मूळ फ्रेंच भाषेतला आहे. फ्रेंचमध्ये त्याचा अर्थ स्वत:ला स्वच्छ करणे किंवा नटणे आणि थटणे असा होतो. त्याचा अर्थ कमोड किंवा शौचास जाणे असा होत नाही.

तुकाराम मुंढे यांनी काय प्रतिक्रिया दिली?

या कारवाईवर एफडीएचे आयुक्त तुकाराम मुंढे यांनी प्रतिक्रिया दिली आहे. “अन्न व औषध प्रशासनाचे सर्वोच्च प्राधान्य नागरिकांच्या आरोग्याचे संरक्षण हे आहे. कोणतेही सौंदर्य प्रसाधन उत्पादन कायद्यानुसार आवश्यक असलेल्या लेबलिंगशिवाय बाजारात विक्रीसाठी उपलब्ध करून देणे ही अत्यंत गंभीर बाब आहे. अशा उत्पादनांचा स्रोत, गुणवत्ता आणि सुरक्षितता पडताळणे कठीण होते. त्यामुळे अशा नियमभंग करणाऱ्या उत्पादक, वितरक आणि विक्रेत्यांविरुद्ध कठोर कायदेशीर कारवाई करण्यात येईल”, अशी प्रतिक्रिया तुकाराम मुंढे यांनी दिली आहे.