वाडी पोलिस ठाण्याच्या हद्दीतील दवलामेटी येथील म्हाडा कॉलनीत राहणाऱ्या दाम्पत्याचे मृतदेह शुक्रवारी त्यांच्या घरात आढळले. गंगाधर भोंगाडे (७५) आणि कौशल्या भोंगाडे (७०) अशी मृतांची नावे आहेत. घरातून तीव्र दुर्गंधी येत असल्याची माहिती मिळाल्यानंतर हा प्रकार उघडकीस आला. या घटनेने हळहळ व्यक्त होत आहे.

Chandrashekhar Bawankule: सपकाळांना राज्यात फिरु देणार नाही; चंद्रशेखर बावनकुळेंचा थेट इशारा, असं का म्हणाले?
गंगाधर भोंगाडे हे संरक्षण आयुध निर्माणीमधून सेवानिवृत्त झाले होते. दोघेही वाढत्या वयामुळे आणि विविध व्याधींनी त्रस्त असल्याचे कळते. शुक्रवारी सकाळी त्यांचे जावई घरी भेट देण्यासाठी आले असता घर बंद आढळले. घराच्या आतून दुर्गंधी येत असल्याने त्यांनी पोलिसांना कळविले. पोलिसांनी घरात प्रवेश करून पाहणी केली असता गंगाधर भोंगाडे यांचा मृतदेह स्वयंपाकघरात, तर कौशल्या भोंगाडे यांचा मृतदेह शयनकक्षात आढळला.

आधी मृत्यू कुणाचा?
या दाम्पत्याचा मृत्यू नेमका कशामुळे झाला, याबाबत अद्याप स्पष्टता नाही. वृद्धत्व आणि प्रकृती अस्वास्थ्यामुळे मृत्यू झाल्याचा अंदाज वर्तविला जात आहे. अन्य शंकाही व्यक्त होत आहेत. हा मृत्यू वृद्धापकाळाने झाला असल्यास दोघांपैकी कुणाचा मृत्यू आधी झाला आणि कुणाचा नंतर हा प्रश्न उपस्थित झाला आहे. जोडीदाराच्या अचानक मृत्यूचे दुःख तसेच वार्धक्यातील असहायतेच्या जाणिवेतून बसलेल्या धक्क्यातून दुसऱ्या व्यक्तीचा मृत्यू झाला असावा, असाही अंदाज आहे. दोन्ही मृतदेह शवविच्छेदनासाठी शासकीय रुग्णालयात पाठविण्यात आले असून अहवालानंतर मृत्यूचे नेमके कारण स्पष्ट होणार आहे.